ကလေးမွေးပြီး ဘယ်လောက်အကြာမှာ အမျိုးသားနဲ့ ပြန်ချစ်လို့ရပြီလဲ

 

ကလေးမွေးပြီး ဘယ်လောက်အကြာမှာ အမျိုးသားနဲ့ ပြန်ချစ်လို့ရပြီလဲ

ဗိုက်ခွဲပြီးပဲမွေးမွေး၊ရိုးရိုးပဲမွေးမွေး ကလေးမွေးပြီးပါက အတူနေလိင်ဆက်ဆံခြင်းကို ၄၅ ရက် ရှောင်ရန် ဆရာဝန်တွေ၊ဆေးပညာရှင်များက အကြံပြုပြောကြားထားပါတယ်။

ဒီလိုပြောရတဲ့အကြောင်းကတော့ သားအိမ်ခေါင်း နဲ့ သားအိမ်တို့ဟာ ကလေးမွေးပြီးနောက် ၄၅ရက်လောက် ကြာတော့မှသာ အနာကောင်းကောင်းကျက်ပြီး မူလအနေအထားအခြေအနေကို ပြန်ရောက်တာကြောင့် ဖြစ်ပါတယ်။

မီးဖွားပြီးခါစမှာ သားအိမ်အတွင်းမျက်နှာပြင်ဟာရောင်ရမ်းနေပြီး ပိုးဝင်ဖို့လွယ်ကူပါတယ်။အထူးသဖြင့် အချင်းတွယ်ကပ်ခဲ့တဲ့ သားအိမ်နေရာက ပိုးဝင်နိုင်ခြေပိုများပါတယ်။

ဒါကြောင့် အဲ့လိုအချိန်မှာ လိင်ဆက်ဆံတာက သားအိမ်ကို ပိုးဝင်ရောက်ကူးစက်စေနိုင်ပါတယ်။

ကလေးမွေးပြီးနောက်မှာ မိန်းမကိုယ်ကနေ အရည်ကြည် သို့မဟုတ် ပန်းရောင်အရည် ဆင်းတာက နှစ်ပတ်ကနေ ရှစ် ပတ်အထိကြာတတ်ပါတယ်။

အဲ့လိုအရည်ကြည်ဆင်းတဲ့အခါမှာ ရာသီလာရင် အဖြူဆင်းရင် မိန်းမကိုယ်ထဲထည့်သုံးတဲ့ Tampons ထည့်တာတို့၊Menstrual cup ထည့်တာတို့ကိုလည်း ရှောင်ရပါမယ်။

မီးဖွားပြီးခါစ ၄၅ရက်အတွင်းမှာ မိန်းမကိုယ်ထဲကို Tampons တို့ Menstrual cup တို့ထည့်ခြင်းဟာလည်း လိင်ဆက်ဆံခြင်းလို သားအိမ်ထဲကို ပိုးတွေဝင်ရောက်ကူးစက်စေနိုင်လို့ပါ။

ကလေးမွေးပြီး၄၅ရက်ပြည့်ရင် အတူနေလိင်ဆက်ဆံလို့ရတယ်လို့ဆိုပေမယ့် တယောက်နဲ့တယောက် အနာကျက်နှုန်းက မတူနိုင်တာကြောင့် တချို့သူတွေမှာ ၄၅ရက်ထက်ပိုပြီးကြာမှ အနာကျက်တာမျိုးဖြစ်ပြီး အတူနေလိင်ဆက်ဆံလို့ရတာလည်းဖြစ်နိုင်ပါတယ်။

ဒီအတွက်

၄၅ရက်ပြည့်ဖို့ တပတ် သို့မဟုတ် နှစ်ပတ်အလိုလောက်မှာ အိုဂျီနဲ့ပြန်ပြရပါမယ်။

အဲ့အခါ အိုဂျီက သားအိမ်အခြေအနေ၊သားအိမ်ခေါင်းအခြေအနေ စတာတွေကိုစမ်းသပ်စစ်ဆေးပြီး ၄၅ရက်ပြည့်တဲ့အခါ အတူနေလိင်ဆက်ဆံလို့ရမရ ကို ဆုံးဖြတ်ပေးပါမယ်။

အများအားဖြင့်တော့ ၄၅ရက်ပြည့်တာနဲ့ အတူနေလိင်ဆက်ဆံလို့ရတာများပါတယ်။

အိုဂျီနဲ့ပြသစမ်းသပ်ပြီး အိုဂျီဆီက မီးဖွားပြီး၄၅ရက်ပြည့်တဲ့အခါအတူနေလိင်ဆက်ဆံလို့ရတယ်ဆိုတဲ့ ထောက်ခံချက်ရပြီးသည့်တိုင်အောင် အတူနေတဲ့အခါမှာ သတိထားလိုက်နာရမယ့်အချက်တွေရှိပါတယ်။

အဲ့ဒါတွေကတော့ အောက်ပါအတိုင်းဖြစ်ပါတယ်။

၄၅ရက်ပြည့်လို့စပြီးအတူနေလိင်ဆက်ဆံရာမှာ ကြမ်းတမ်းတဲ့လိင်ဆက်ဆံပုံ၊ဆက်ဆံနည်းတွေကိုရှောင်ရပါမယ်။

ဘာလို့လဲဆိုတော့ ချုပ်ကြောင်းနေရာတွေမှာ အနည်းငယ်ရောင်ရမ်းမှုတွေကျန်နေနိုင်သေးလို့ပါ။ ခုမှချုပ်ရိုးကျက်ခါစအခြေအနေမှာ ချုပ်ထားတဲ့နေရာတဝိုက်နားက အရေပြားကလည်း တင်းတင်းကြီးဖြစ်နေတတ်ပြီး အားတအားသုံးပြီးလိင်ဆက်ဆံပါက ချုပ်ထားတဲ့နေရာကပြဲတာဖြစ်နိုင်ပါတယ်။

ဒါ့အပြင် ကလေးမွေးဖွားပြီးနောက်မှာ ဟော်မုန်းအပြောင်းအလဲတွေဖြစ်တာကြောင့် အတူနေလိင်ဆက်ဆံတဲ့အခါ မိန်းမကိုယ်က လုံလောက်အောင်စိုစွတ်မှုမရှိဘဲ ခြောက်သွေ့နေတာမျိုးဖြစ်ကာ နာကျင်မှုကိုခံစားရနိုင်ပါတယ်။

အဲ့ဒီအတွက် မိန်းမကိုယ်မွေးလမ်းကြောင်းကိုချောမွေ့စိုစွတ်စေသော ဂျယ်လ်များ၊အဆီများကို သုံးဖို့လိုပါတယ်။

ဒီလိုမျိုးသုံးသော်လည်း အတူနေလိင်ဆက်ဆံတဲ့အခါ နာကျင်မှုကရှိနေပြီး အချိန်အတော်ကြာသည့်တိုင်အောင် ပျောက်မသွားဘူးဆိုပါက အိုဂျီနဲ့ပြန်လည်ပြသဖို့လိုပါတယ်။

Dr 528

ဆက်စပ် ဆောင်းပါးများ