ကိုယ္၀န္ေဆာင္ေမေမ နဲ႔ နို႔တိုက္ေမေမေတြ ဆံပင္ေဆးဆိုးတာ လုပ္လို႔ရလား။

ကိုယ်ဝန်ဆောင်မေမေတွေ မေးလေ့ရှိတဲ့ မေးခွန်းတွေထဲမှာ ကိုယ်ဝန်ဆောင်စဉ်နဲ့ ကလေးနို့တိုက်နေစဉ်မှာ ဆံပင်ဆေးဆိုးတာ လုပ်လို့ရသလားဆိုတာဟာ အမေးများဆုံးမေးခွန်းမဟုတ်ပေမယ့် မကြာခဏမေးလေ့ရှိတဲ့ မေးခွန်းတခုဖြစ်ပါတယ်။

ကိုယ်ဝန်ဆောင်စဉ်မှာတောင်မှ ဆံပင်ဆေးဆိုးချင်ရသလားဆိုပြီး ကိုယ်ဝန်ဆောင်မေမေတွေကို အပြစ်မြင်လို့မရပါဘူး။

ကိုယ်ဝန်ဆောင်တယ်ဆိုတာဟာ အစစအရာရာပြည့်စုံနေရင်တောင် အနည်းနဲ့အများစိတ်ဖိစီးစရာရှိနိုင်ပြီး ဆံပင်ဖြောင့်တာ၊ ကောက်တာ၊ ဆေးဆိုးတာ၊ ပေါင်းတင်တာ စတဲ့အပြောင်းအလဲလေးတခုခုလုပ်လိုက်ခြင်းဖြင့် တင်းကြပ်နေတဲ့စိတ်ဖိစီးစရာတွေဟာ အထိုက်အလျောက်လျော့ပါးသက်သာသွားနိုင်ပါတယ်။

သို့သော် ခုခေတ်မှာ ဓါတုပစ္စည်း (Chemicals) တွေဟာ ကျန်းမာရေးကို ထိခိုက်နိုင်ကြောင်း အများစုအနေနဲ့ သိလာတဲ့အတွက် ကိုယ်ဝန်ဆောင်မေမေတွေအနေနဲ့ ကိုယ်ဝန်ဆောင်စဉ် ဆံပင်ဖြောင့်တာ၊ ဆေးဆိုးတာစသဖြင့်တခုခုလုပ်တဲ့အခါ အရင်ကလုပ်နေကျဖြစ်ရင်တောင်မှ ခုချိန်မှာလုပ်ရင် ဗိုက်ထဲကကလေးလေးအပေါ်မှာ ထိခိုက်မှုများဖြစ်မလားဆိုပြီး ကိုယ်ကလုပ်ချင်ပေမယ့် မဝံ့မရဲ ဝေခွဲမရဖြစ်ရပါတယ်။

ဆံပင်ဆေးဆိုးတဲ့အခါမှာ သုံးတဲ့ဓါတုပစ္စည်းတွေက ဦးရေပြားကနေတဆင့် သွေးကြောထဲရောက်နိုင်တယ်လို့တချို့ကထင်ကြပေမယ့် လေ့လာချက်တွေအရ အများအားဖြင့် မဆိုစလောက်ပမာဏပဲ (ဒုက္ခမဖြစ်စေနိုင်တဲ့ပမာဏ) ရောက်နိုင်ကြောင်းသိရပါတယ်။

ကိုယ်ဝန်ဆောင်စဉ်ဆံပင်ဆေးဆိုးတာလုပ်လို့ ဆိုးကျိုးကြီးကြီးမားမားဖြစ်တာမျိုးကိုတော့ ခုထိမတွေ့ရသေးကြောင်း သုတေသနပညာရှင်တွေကပြောထားပါတယ်။

သို့ပေမယ့် သန္ဓေသားထိခိုက်နိုင်ခြေနည်းအောင် ကိုယ်ဝန်စစရှိချင်းကာလ ကိုယ်ဝန်နုစဉ်မှာ ဆံပင်ဆေးဆိုးတာကိုရှောင်သင့်ပြီး ကိုယ်ဝန်၃လကျော်လောက်မှပဲ ဆိုးသင့်ကြောင်း ပညာရှင်အများစုက ထပ်လောင်းပြောထားပါတယ်။

ဆေးဆိုးတဲ့အခါမှာလည်း ခဏခံဆိုးဆေး (Temporary dye)၊ အသင့်တင့်ခံဆိုးဆေး (Semi-permanent dye)၊ ရေရှည်ခံဆိုးဆေး (Permanent dye) သုံးမျိုးရှိတဲ့အနက် Semi-permanent ဆိုးဆေးဖြစ်တဲ့ အပင်ကရတဲ့ ဒန်း (Henna) ကတော့ ကိုယ်ဝန်ဆောင်မေမေတွေအတွက်ပိုသင့်တော်ပါတယ်။

ကိုယ်ဝန်ဆောင်ချိန်မှာ ခန္ဓာကိုယ်ကဟော်မုန်းတွေဟာ အပြောင်းအလဲများစွာဖြစ်တဲ့အတွက် အရင်ကတည့်ခဲ့တဲ့အရာတွေဟာ ကိုယ်ဝန်ဆောင်ချိန်ကျမှ ဓါတ်မတည့်တာမျိုးလည်းဖြစ်နိုင်ပါတယ်။

ဒါကြောင့် ဆံပင်ဆေးဆိုးမယ်ဆိုရင် ဘယ်ဆေးအမျိုးအစားဘယ်လောက်ကောင်းတာပဲသုံးသုံး၊ ကိုယ်အရင်ဆိုးနေကျ ဆံပင်ဆိုးဆေးအမျိုးအစားဆိုရင်တောင်မှလည်း မဆိုးခင် အရင်ဆုံးနားအနောက် အရေပြားပေါ်မှာ အနည်းငယ်စမ်းသပ်ကြည့်ပြီး တည့်မှဆိုးသင့်ပါတယ်။

တခေါင်းလုံးအနှံ့ ဆံပင်ဆိုးဆေးတင်ပြီးတဲ့အခါမှာလည်း ဆိုးဆေးမြဲအောင်ရည်ရွယ်ချက်ဖြင့် အချိန်အကြာကြီးနေမှ ခေါင်းလျှော်ချတာမျိုးမလုပ်ပါနဲ့။

အနည်းဆုံး အချိန်ပမာဏစောင့်ပြီးရင် ခေါင်းကို သေချာလျှော်ပေးပါ။

လေဝင်လေထွက်ကောင်းတဲ့ ဆိုင်နေရာတွေမှာ ဆံပင်ဆေးဆိုးခြင်းဟာ ခန္ဓာကိုယ်ထဲကို ဓါတုပစ္စည်းတွေ ရောက်ရှိနိုင်ခြေပိုနည်းစေပါတယ်။

အိမ်မှာ မိမိဘာသာမိမိ ဆေးဆိုးမယ်ဆိုပါကလည်း လေဝင်လေထွက်ကောင်းတဲ့ နေရာမှာဆိုးပါ။

ဆံပင်ဆိုးဆေးတွေကို လက်အိတ်ဝတ်ပြီးမှသာ ကိုင်တွယ်ပါ။

နို့တိုက်မေမေတွေလည်း ဆံပင်ဆေးဆိုးတာ လုပ်နိုင်ပါတယ်။ ဦးရေပြားကနေသွေးကြောထဲရောက်ရှိနိုင်ခြေရှိတဲ့ ဓါတုပစ္စည်းပမာဏာဟာ အနည်းငယ်သာရှိနိုင်တဲ့အတွက် မိခင်နို့ရည်ထဲ ဓါတုပစ္စည်းပါနိုင်ခြေဟာလည်း အလွန်နဲပါတယ်။

ဒါပေမယ့် ကလေးကို ဆံပင်ဆေးဆိုးတဲ့ ဆိုင်ခေါ်သွားတာမျိုး၊ ဆေးဆိုးနေရင်းနဲ့ နို့တိုက်တာမျိုး၊ အိမ်မှာ မိမိဘာသာဆေးဆိုးတယ်ဆိုရင်လည်း ဆေးဆိုးနေချိန် အနားထားတာမျိုးကိုတော့ ရှောင်ဖို့လိုပါမယ်။

ပိုစိတ်ချရချင်ရင်တော့ နို့တိုက်မိခင်တွေဆိုရင် ကလေးအသက် ခြောက်လပြည့်ပြီးမှ ဆံပင်ဆေးဆိုးတာ ပိုကောင်းပါတယ်။

Dr 528

ဆက်စပ် ဆောင်းပါးများ