ကိုယ်ဝန်ပျက်ကျခြင်း မဖြစ်စေဖို့ ကာကွယ်နိုင်သော နည်းလမ်းများ

ကိုယ်ဝန်ပျက်ကျခြင်း မဖြစ်စေဖို့ ကာကွယ်နိုင်သော နည်းလမ်းများ

ကိုယ်ဝန်ပျက်ကျခြင်းသည် မိခင်များအတွက် စိတ်အထိခိုက်ဆုံးဝေဒနာတစ်ခုပါ။ ထို့ကြောင့် မိမိရင်သွေးငယ်လေးကို မဆုံးရှုံးစေဖို့ ကိုယ်ဝန်မဆောင်ခင်နှင့် ကိုယ်ဝန်ဆောင်စဉ်အတွင်း လိုက်နာသင့်သည့် အကြောင်းအရာလေးတွေကို ပြောပြပေးလိုပါတယ်။ ကိုယ်ဝန်ဆောင်စဉ် မိခင်များသည် မိမိကိုယ်ကို ကျန်းမာအောင်ပြုမှုနေထိုင်ခြင်း၊ စနစ်တကျစားသုံးခြင်း၊ လေ့ကျင့်ခန်းပုံမှန်လုပ်ခြင်း၊ အနေအထားမှန်မှန်ဖြင့် အိပ်စက်အနားယူခြင်း အစရှိသည့်နည်းလမ်းများဖြင့် ကိုယ်ဝန်ပျက်ကျခြင်းမရှိအောင် ကာကွယ်နိုင်ပါတယ်။

ကိုယ်ဝန်မဆောင်ခင်အချိန်တွင် ပြုလုပ်ပေးရမယ့် အကြောင်းအရာလေးတွေရှိပါတယ်။ ၎င်းတို့မှာ-

– ကူးစက်ရောဂါများရှိ မရှိစစ်ဆေးခြင်း

လိင်ဆက်ဆံရာမှတစ်ဆင့် ကူးစက်တတ်သော ရောဂါများဖြစ်သည့် ဂနိုရောဂါ၊ ကာလသားရောဂါ၊ ခုခံအားကျဆင်းမှုကူးစက်ရောဂါ စသည့်ရောဂါများ ရှိ၊မရှိကို ကိုယ်ဝန်မရှိခင်ကတည်းက စစ်ဆေးသင့်ပါတယ်။ ထိုရောဂါများကူးစက်ခံနေရပါက ကိုယ်ဝန်ပျက်ကျမှုနှုန်းပိုများပါတယ်။

– ကာကွယ်ဆေးထိုးခြင်း

ကိုယ်ဝန်မဆောင်ခင် ထိုးသင့်သည့် ကာကွယ်ဆေးများကို သေချာစွာ ထိုးထားသင့်ပါတယ်။ အရင်က ကာကွယ်ဆေးများ ထိုးသည်၊ မထိုးသည် မသေချာပါက အစအဆုံး ပြန်လည်စစ်ဆေး၍ ကာကွယ်ဆေးများကို ထိုးထားသင့်ပါတယ်။

– တစ်ချို့သော ရောဂါများသည် ကိုယ်ဝန်ပျက်ကျနိုင်ခြင်း

လည်ပင်းရောဂါ၊ အတက်ရောဂါနှင့် တစ်ချို့သော သွေးရောဂါများသည် ကိုယ်ဝန်ပျက်ကျခြင်းကိုဖြစ်စေနိုင်ပါတယ်။ သို့သော် သေချာစွာ ဆေးကုသမှုခံယူထားပါက ပျက်ကျခြင်းမဖြစ်နိုင်ပါဘူး။ မိမိတွင်သာမက မိမိ မိသားစုထဲတွင်လည်း မျိုးရိုးလိုက်တတ်သော ရောဂါများ ရှိ၊ မရှိကို ဆရာဝန်နှင့်သေချာစွာ စစ်ဆေးထားသင့်ပါတယ်။

– သံဓာတ်အားဆေးသောက်သုံးခြင်း

ကလေးယူဖို့ အစီအစဉ်ရှိသည်နှင့် ကိုယ်ဝန်မဆောင်ခင် နှစ်လမှစ၍ သံဓာတ်အားဆေးကို နေ့စဉ်သောက်သုံးပေးသင့်ပါတယ်။ သံဓာတ်အားဆေးသောက်သုံးပေးခြင်းဖြင့် မိမိမွေးဖွားလာမယ့်ကလေးများတွင် မွေးရာပါရောဂါများ ပါလာခြင်းမှ ကာကွယ်နိုင်ပါတယ်။

– caffeineဓာတ်ပါဝင်သောအရည်များကို ရှောင်ခြင်း

ကိုယ်ဝန်မဆောင်ခင်အချိန်ကတည်းက caffeineဓာတ်ပါဝင်သော ကော်ဖီကို တစ်နေ့ ၂ကြိမ်ထက်ပိုမသောက်သင့်ပါဘူး။ caffeineဓာတ်သည် အမျိုးသမီးဟော်မုန်းများကိုလျော့နည်းစေပြီး ကလေးကို ထိခိုက်နိူင်ပါတယ်။

အထက်ပါ ကိုယ်ဝန်မဆောင်ခင် လိုက်နာရမယ့်အချက်များရှိသကဲ့သို့ ကိုယ်ဝန်ဆောင်စဉ်အတွင်း ပြုလုပ်ရမယ့်အရာများလည်း ရှိပါသေးတယ်။ ၎င်းတို့မှာ-

– ပုံမှန်လေ့ကျင့်ခန်းပြုလုပ်ပေးခြင်း

ပြင်းထန်သော လေ့ကျင့်ခန်းမျိုးမဟုတ်ပဲ တစ်နေ့နာရီဝက်မျှ လမ်းလျှောက်ပေးခြင်း၊ ကိုယ်ဝန်ဆောင်ယောဂလေ့ကျင့်ခြင်း စသည့် ပေါ့ပါးသော အားကစားများကိုသာ လုပ်ပေးသင့်ပါတယ်။ ပြင်းထန်သော လေ့ကျင့်ခန်းသည် ကိုယ်ဝန်ပျက်ကျစေပါတယ်။ အဘယ်ကြောင့်ဆိုသော် ကိုယ်အပူချိန်ကို မြင့်တက်စေပြီး ကလေးဆီသို့ သွေးစီးဆင်းမှုနည်းစေပါတယ်။ ချော်လဲခြင်းမဖြစ်အောင်လည်း သတိထားသင့်ပါတယ်။ ဆိုင်ကယ်စီးခြင်း၊ လမ်းကြမ်းသောနေရာများသို့ ကားစီး၍သွားခြင်း စသည်တို့ကိုလည်း ရှောင်သင့်ပါတယ်။

– အသားစိမ်း၊ ငါးစိမ်းများ၊ မသန့်ရှင်းသော နို့နှင့်နို့ထွက်ပစ္စည်းများကို မစားသင့်ပါ။ ၎င်းတို့ထဲမှ ပိုးမွှားများသည် ခန္ဓာကိုယ်ထဲသို့ဝင်ရောက်ပြီး ကလေးကိုထိခိုက်စေနိုင်ကာ ကိုယ်ဝန်ပျက်ကျသည်အထိ အန္တရာယ်ရှိပါတယ်။ ထို့ကြောင့် အစားအစာများကို သေချာစွာ ချက်ပြုတ်ပြီးမှ စားသင့်ပါတယ်။

– အရက်၊ ဆေးလိပ်နှင့် မူးယစ်ဆေးဝါးများ သုံးစွဲခြင်းမှ ရှောင်ကြဉ်ရပါမယ်။ အရက်၊ ဆေးလိပ်၊ မူးယစ်ဆေးဝါးများ သောက်သုံးခြင်းသည် ကိုယ်ဝန်ဆောင်မိခင်အတွက်လည်း အန္တရာယ်ရှိသကဲ့သို့ ကလေးကိုပါ ထိခိုက်နိုင်ပြီး နောက်ဆုံးကိုယ်ဝန်ပျက်ကျသည်အထိဖြစ်နိုင်ပါတယ်။

– ကိုယ်ဝန်ဆောင်စဉ် တစ်ကိုယ်လုံး မည်သည့် နေရာမှ ဓာတ်မှန်မရိုက်ရပါ။ ဓာတ်ရောင်ခြည်များသည် ကလေးကိုထိခိုက်စေပါတယ်။ ဒါ့အပြင် ခဲ၊ သတ္တု၊ သံထည်ပစ္စည်းများနှင့်လည်း ဝေးဝေးရှောင်သင့်ပါတယ်။

– စိတ်ဖိစီးမှုဒဏ်မှ ကင်းဝေးအောင်နေပါ။ စိတ်ဖိစီးမှုများခြင်းကြောင့် ကိုယ်ဝန်ဆောင်စဉ် ပျို့အန်ခြင်း၊ ခေါင်းမူးခြင်းတို့ ခံစားရတတ်ပါတယ်။ ဒီလိုမဖြစ်ရလေအောင် စိတ်အပန်းဖြေသည့် နည်းလမ်းများဖြစ်သည့် အသက်ရှူခြင်းလေ့ကျင့်ခန်း၊ တရားထိုင်ခြင်း၊ ယောဂကျင့်ခြင်း၊ ပန်းချီဆွဲခြင်း၊ အပင်စိုက်ပျိုးခြင်း စသည်တို့ကို ပြုလုပ်ပေးသင့်ပါတယ်။

– သန့်ရှင်းလတ်ဆတ်သော ဟင်းသီးဟင်းရွက်များ၊ သစ်သီးဝလံများကို နေ့စဉ်စားသုံးပါ။ လတ်ဆတ်တယ်ဆိုတဲ့နေရာမှာ သဘာဝအတိုင်းပေါက်သော ဟင်းသီးဟင်းရွက်များကို ဆိုလိုပါတယ်။ ဓာတ်မြေဩဇာ၊ ရွက်ဖျန်းဆေးများသုံးထားသော ဟင်းသီးဟင်းရွက်များကို စားသုံးပါက ကလေးကော မိခင်ပါ ထိခိုက်နိုင်ပါတယ်။

– သေချာချက်ပြုတ်ထားသော အသားများ၊ Omega-3 ပြည့်ဝစွာပါဝင်သော အရိုးပါဝါးစားလို့ရသည့် ငါးသေးသေးလေးများကို စားသုံးပါ။ အစိမ်းရောင်ရှိသော ဟင်းသီးဟင်းရွက်များနှင့် ပဲအမျိုးမျိုးကိုလည်း စားသုံးနိုင်ပါတယ်။

– ချိုသော အစားအစာများ၊ ဂတ်စ်ပါသော အချိုရည်များသောက်သုံးခြင်းမှရှောင်ကြဉ်ပါ။

– နောက်ဆုံးတစ်ချက်အနေနဲ့ ရေများများသောက်ပါ။ ကိုယ်ဝန်ဆောင် မိခင်တစ်ဦးအနေနဲ့ တစ်နေ့ကို ရေ ၂.၂လီတာ သောက်သုံးသင့်တယ်လို့ ဆိုပါတယ်။ ရေသန့်(သို့) သေချာစွာဆူပွက်အောင်တည်ထားသော ရေကျက်အေးကိုသာ သောက်သုံးပေးပါ။

အပေါ်မှာပြောပြခဲ့သော အကြောင်းအရာများကို သေချာစွာ သိရှိနားလည်ပြီး ကိုယ်ဝန်ဆောင်မိခင်များအနေနဲ့ လိုက်နာစေလိုပါတယ်။ မလိုအပ်ပဲ မိမိရင်သွေးရတနာလေးများကို မဆုံးရှုံးစေဖို့၊ မိခင်ကော ကလေးပါ ကျန်းမာစေဖို့ ရည်ရွယ်၍ရေးသားလိုက်ရပါသည်။

Dr.သီတာလှိုင်(ဆေး-၂)