သင့်ဘဝပျော်ရွှင်ကျေနပ်မှု လူလတ်ပိုင်းအရွယ် ပျော်ရွှင်မှုသည် နေထိုင်သော နေရာဒေသအလိုက် ကွာခြားမှုရှိကြောင်း The Laneet လေ့လာမှုတစ်ခုက ထုတ်ဖော်တင်ပြထားသည်။ အင်္ဂလန်နိုင်ငံနှင့် အမေရိကန်ပြည်ထောင်စုတို့တွင် နေထိုင်ကြသူများ၏ ဘဝကျေနပ် နှစ်သက် ပျော်ရွှင်မှုကို လေ့လာကြည့်လျှင် ယူ – U ပုံသဏ္ဍာန်မြင်တွေ့ရမည်ဖြစ်သည်ဟုဆိုသည်။ လူလတ်ပိုင်း အရွယ် တွင် ဘဝ၏ကျေနပ်ပျော်ရွှင်မှု နိမ့်ကျသွားကြောင်းတွေ့ရမည်ဖြစ်သည်။ အာဖရိကဒေသတွင် ဘဝ၏ကျေနပ်ပျော်ရွှင်မှုမှာ ဘဝတစ်လျှောက်လုံး၌နိမ့်ကျလျက်ရှိသည်။ အရှေ့ ဥရောပဒေသ၊ ယခင်ဆိုဗီယက်ယူနီယံနှင့် တောင်အမေရိကဒေသတို့တွင် အသက်အရွယ်ကြီး လာသည် နှင့်အမျှ ဘဝ၏ကျေနပ်ပျော်ရွှင်မှုမှာလည်း တစ်စထက်တစ်စလျော့နည်းကျဆင်းသွားသည်။ ထိုသို့ဖြစ်ရခြင်းမှာ အကြောင်းခြင်းရာများစွာနှင့် ဆက်နွယ်မှုရှိပြီး ရှုပ်ထွေးလှသည်ဟု University College London မှ ပါမောက္ခ Andrew Steptoe က ပြောကြားခဲ့သည်။ အသက်အရွယ်ကြီးသူများတွင် နာတာရှည်ရောဂါများနှင့် ကာယသုခ၊ စိတ္တသုခနှင့် လူမှုရေးသုခတို့ နည်းပါးလာခြင်းကြောင့် ဘဝ၏ ကျေနပ် ပျော်ရွှင်မှု လျော့နည်းသွားတတ်ကြသည်။ သုတေသနပညာရှင်များသည် နိုင်ငံပေါင်း ၁၆၀ ကျော်မှ ကမ္ဘာ့လူဦးရေ၏ ၉၈%အပေါ် လေ့လာ သုံးသပ်တင်ပြခဲ့ခြင်းဖြစ်သည်။ အနောက်နိုင်ငံများတွင် ဘဝနေထိုင်မှုအပေါ် ကျေနပ်ပျော်ရွှင်မှု အနိမ့်ဆုံး ကာလမှာ အသက် ၄၅နှစ်နှင့် ၅၄နှစ်ကြားဖြစ်သည်ဟုဆိုသည်။ Prineaton University in the US မှ သုတေသနပညာရှင် Angus Deaton မှ ထိုသို့ဖြစ်ရစေခြင်းမှာ စီးပွားရေးအခြေအနေပေါ်မူတည်နေသည်ဟု ရှင်းပြခဲ့သည်။ ယခင်ဆိုဗီယက်ယူနီယံနိုင်ငံများမှ လူများသည် ဘဝကျေနပ်ပျော်ရွှင်မှုမှာ အသက်ကြီးလာသည်နှင့် အမျှ တဖြည်းဖြည်းလျော့နည်းလာသည်။ ခြုံငုံကြည့်လျှင် အနောက်နိုင်ငံများမှ လူများထက် ကျေနပ်ပျော်ရွှင်မှု နည်းကြသည်။ ဤအချက်မှာလည်း စီးပွားရေးနှင့် ဆက်နွယ်သည်ဟုဆိုသည်။ အာဖရိကဒေသ (Sub-Saharan Africa) မှလူများသည် ဖိစီးမှုများနှင့် ပူပင်သောကများ လွန်ကဲ ကြသည့်အတွက် ဘဝတစ်လျှောက်လုံး ကျေနပ်ပျော်ရွှင်မှု နိမ့်ပါးလျက်ရှိကြသည်။ ပျော်ရွှင်မှုကို ငွေနှင့် အချိုးချမရနိုင်သော်လည်း စီးပွားရေးမြင့်မားလာလျှင် သုခချမ်းသာလည်း မြင့်မားလာသည်ဟု ပါမောက္ခ Steptoe က ပြောကြားခဲ့ပါသည်။
Author – ဒေါက်တာဇာနည်