အိမ်ထောင်စုတစ်ခုအတွက် အကြီးမားဆုံးပြဿနာမှာ လင်ယောက်ျားကဖြစ်စေ၊ ဇနီးမယားကဖြစ်စေ ဖောက်ပြန်ခြင်းဖြစ် သည်။ ဇနီးမယား (သို့မဟုတ်) လင်ယောက်ျား၏ဖောက်ပြန်မှုကို ပထမဦးဆုံးသိရှိလိုက်ရချိန်တွင် ကမ္ဘာကြီးပျက်သုန်းသွားသကဲ့ သို့ခံစားကြရသည်ဟုဆိုပါသည်။ ယင်းသည် အိမ်ထောင်ရေးပြိုကွဲမှု၏ လမ်းစတစ်ခုအသွင်လည်း ဖြစ်သွားတက်သည်။
သစ္စာမဲ့ခြင်း (သို့မဟုတ်) ဖောက်ပြန်ခြင်းကဲ့သို့ တချို့သော အိမ်ထောင်ရေးပြဿနာများမှာလည်း နှလုံးသားနာကျင်မှုနှင့် စိတ်ဆင်းရဲမှုတို့ကိုဖြစ်စေတက်သည်။ ငွေကြေးအဆင်မပြေမှုများ၊ ပြဿနာများ၊ သားသမီးရေးကိစ္စများ၌ သဘောမတူညီမှုများ၊ ပြင်းထန်သောရောဂါဝေဒနာခံစားရခြင်းစသည်တို့မှာလည်း ကြီးမားသော စိတ်မချမ်းသာမှု သောကဝေဒနာကိုဖြစ်စေနိုင်သည်။
အမျိုးသမီးနှင့်အမျိုးသားနှစ်ဦးတို့ကြား လက်ထပ်ခြင်းသည် တစ်ဦးပေါ်တစ်ဦးသစ္စာစောင့်မှု၏ ပြယုဂ်တစ်ခုလည်းဖြစ်သင့် သည်။ သစ္စာမဲ့မှုကြောင့်ပေါက်ကွဲမှုဖြစ်လျှင်ကွာရှင်းပြတ်စဲမှု၌ နိဂုံးချုပ်သွားစေတက်သည်။အချို့သောနိုင်ငံများတွင် အမျိုးသား လေးဦးတွင် တစ်ဦး၊ အမျိုးသမီး ၁၀ ဦးတွင် တစ်ဦးမှာအိမ်ထောင်ပြင်ပတွင် လိင်ပိုင်းဆိုင်ရာဖောက်ပြန်မှုရှိတက်ကြောင်းတွေရ၏။
သစ္စာမဲ့မှု (ဖောက်ပြန်မှု) သည် ကွာရှင်းပြတ်စဲမှုကို ဦးတည်စေနိုင်သော်လည်း မလွှဲမရှောင်သာ ဖြေရှင်းရခြင်းမျိုးတော့ မဟုတ်ပေ။ အခြားနည်းများနှင့်ပြေလည်အောင် စွမ်းဆောင်ပေးနိုင်မည်လည်းဖြစ်သည်။ ဤတွင်လည်း Counseling ခေါ် နှစ်သိမ့်ဆွေးနွေးပညာပေးမှုအပိုင်းသည် အရေးကြီးလာမည်ဖြစ်၏။
သစ္စာမဲ့မှု (သို့မဟုတ်) ဖောက်ပြန်မှုသည် ထိတ်လန့်တုန်လှုပ်မှု၊ ရှက်ကြောက်မှု၊ စိတ်ကျမှု၊ ပြစ်တင်ခံရမှု၊ နောင်တကြီးစွာ ရမှု စသည်တို့နှင့် ရင်ဆိုင်ကြုံတွေ့ရနိုင်သည်။ ဤပြဿနာကိုဖြေရှင်းရာတွင် အောက်ဖော်ပြပါအချက်များကို လုပ်ဆောင်ရန်လို အပ်မည်ဖြစ်သည်။
(က) အားပေးကူညီခြင်း
စိတ်ပိုင်းဆိုင်ရာခံစားမှုဝေဒနာကို ဖြေဖျောက်စေရန်အားပေးကူညီဖို့လိုအပ်ပါသည်။ မိသားစုဝင်များကဆောင်ရွက်နိုင် သည်။မိတ်ဆွေသင်္ဂဟတို့ကအကူအညီပေးနိုင်သည်။ ခရစ်ယာန်ဘုန်းတော်ကြီးများနှင့် နှစ်သိမ့်ဆွေးနွေးသူများ (Counselors) ၏အားပေးကူညီမှုလည်း လိုအပ်ပါသည်။
(ခ) ခေတ္တခွဲခြားထားပေးခြင်း
ပြဿနာအထွပ်အထိပ်ရောက်နေစဉ်ကာလအတွင်း ဇနီးမောင်နှံနှစ်ဦးအား ခေတ္တခွဲခြားထားပေးသင့်သည်။ ဒေါသပေါက် ကွဲမှု ၊ အကြမ်းဖက်မှု နှင့် အခြားမလိုလားအပ်သော ပြဿနာများရှောင်ရှားရာရောက်ပါသည်။
(ဂ) အချိန်ယူပေးရန် ၊ အချိန်စောင့်ဆိုင်းပေးရန်
နှစ်ဦးနှစ်ဖက် တွေ့ဆုံဆွေးနွေးညှိနှိုင်းဖြေရှင်းမှုကို အချိန်ယူ၍လုပ်ဆောင်ရန်လိုအပ်သည်။ ပြင်ပ၌ပြောနေကျစကားတစ် ခုမှာ သွေးအေးသွားစေလိုခြင်းဖြစ်သည်။ သွေးပူနေစဉ်အမှားပါတက်သည်။ သွေးအေးမှသာ ဆုံးဖြတ်ချက်မှန်ကန်မှု ရနိုင်မည်ဖြစ်
သည်။
သစ္စာမဲ့မှုပြဿနာကို ပြေလည်အောင်ဖြေရှင်းခြင်းမှာ လွယ်ကူသောကိစ္စရပ်တစ်ခုမဟုတ်ပေ။တစ်ဆင့်ပြီးတစ်ဆင့် အချိန်
ယူဖြေရှင်းရတက်ပါသည်။ သစ္စာမဲ့မှု၏နောက်ကွယ်တွင် အိမ်ထောင်ရေးပြဿနာများရှိနေတက်ကြသည်။ ပြဿနာသည်ပြဿနာ
အပေါ်အခြေခံ၍ ထပ်ဆင့်ဖြစ်ပေါ်ခြင်းဖြစ်နိုင်သည်။ သစ္စာမဲ့ခြင်းသည် အိမ်ထောင်ရေးဖောက်ပြန်မှုပြဿနာဖြစ်၏။ယင်း ပြဿနာ သည်ပင် အခြားပြဿနာများအပေါ် အခြေခံကာဖြစ်လာခြင်းဖြစ်နိုင်သည်။
ဆက်ဆံရေးကိုပြန်လည်တည်ဆောက်ရာတွင် ဇနီးမောင်နှံနှစ်ဦးစလုံး၏ ကျေနပ်မှုရရန် အရေးကြီးသည်။ ဆုံးဖြတ်ချက် သည် မျှတမှုရှိစေရန် လိုအပ်သည်။ ဖောက်ပြန်သူ၌အပြစ်ရှိသော်လည်း အပြစ်ကို အခြေခံကျကျကြည့်၍ဖြေရှင်းရန်သာဖြစ်သည်။
သစ္စာမဲ့မှုပြဿနာ၏နောက်ဆက်တွဲ တွဲဆိုးကျိုးများတွင် မိမိကိုယ်မိမိယုံကြည်မှုအားနည်းခြင်း၊ ဆန္ဒလွန်ကဲမှုဖြစ်တက် ခြင်း၊ ချစ်ကျွမ်းဝင်မှုကိုကြောက်လှန့်ခြင်း၊ အရက်အလွန်အကျွံသောက်ခြင်း၊ မူးယစ်ဆေးဝါးသုံးစွဲခြင်း၊ အိမ်ထောင်၌မပျော်ရွှင်ခြင်း တို့ ပါဝင်ကြောင်းတွေ့ရသည်။
သစ္စာမဲ့မှုကြောင့် အိမ်ထောင်ရေးမပြိုကွဲအောင် ပြန်လည်ခိုင်မြဲအောင် အောက်ဖော်ပြပါအဆင့်ဆင့်လုပ်ဆောင်မှုများလို အပ်သည်ဟု ကျွမ်းကျင်ပညာရှင်များဆိုပါသည်။
(၁) ပြဿနာကိုအဆုံးသပ်ပါ။ ရင်ဆိုင်လိုက်ပါ။
(၂) မိမိကိုယ်မိမိ တာဝန်ယူပါ။ မိမိအမှားကိုမိမိမြင်တက်ပါ။
(၃) ဇနီးမောင်နှံနှစ်ဦးကြား တူညီသောပန်းတိုင်ချမှတ်ပါ။
(၄) အိမ်ထောင်ရေးဆိုင်ရာ နှစ်သိမ့်ဆွေးနွေးသူ၏ အကူအညီရယူပါ။
(၅) ပြဿနာ၏ အရင်းအမြစ်ကို အခြေခံကျကျရှုမြင်ပါ။ ရှာဖွေပါ။
(၆) တစ်ဦးအပေါ်တစ်ဦး ယုံကြည်မှု ပြန်လည်တည်ဆောက်ပါ။
(၇) ပွင့်ပွင့်လင်းလင်းရိုးရိုးသားသား ဆွေးနွေးတိုင်ပင်ပါ။
(၈) အချိန်ပေးပါ။ အချိန်စောင့်ပါ။ သွေးအေးပါစေ။
(၉) တက်နိုင်သမျှခွင့်လွှတ်ပေးပါ။ နားလည်ပေးပါ။
(၁၀) အနာဂတ်အတွက် မှန်ကန်သောဆုံးဖြတ်ချက်ချပါ။
AUTHOR – Dr. ဇာနည်