နှစ်ရိပ်နှစ်ထပ်မြင်ခြင်း

နှစ်ရိပ်နှစ်ထပ်မြင်ခြင်း

နှစ်ရိပ်နှစ်ထပ်မြင်တယ်ဆိုတာဟာ သက်ရှိသက်မဲ့အရာပစ္စည်းတွေကို ကြည့်တဲ့အခါမှာ အမှန်တကယ်က တခု၊တယောက်ပဲရှိနေပေမယ့် မိမိမျက်လုံးထဲကျ ပုံရိပ်က နှစ်ခု၊နှစ်ယောက်မြင်နေခြင်းဖြစ်ပါတယ်။

မိမိမြင်တဲ့ နှစ်ခု၊နှစ်ယောက်ပုံရိပ်ဟာ ဘေးချင်းယှဉ်ပြီး မြင်ရတာလည်းဖြစ်နိုင်သလို တခုပေါ်တခု၊တယောက်ပေါ်တယောက်ထပ်ပြီး မြင်ရတာမျိုးလည်းဖြစ်နိုင်ပါတယ်။

ဆေးပညာအရတော့ Diplopia သို့မဟုတ် Double Vision လို့ခေါ်ပါတယ်။

မျက်လုံးတဖက်တည်းလည်းဖြစ်နိုင်သလို မျက်လုံးနှစ်ဖက်စလုံးလည်းဖြစ်နိုင်ပါတယ်။

မျက်လုံးတဖက်တည်းမှာဖြစ်ရင် monocular double vision လို့ခေါ်ပြီး မျက်လုံးနှစ်ဖက်လုံးဖြစ်ရင်တော့ binocular double vision လို့ခေါ်ပါတယ်။

နှစ်ရိပ်နှစ်ထပ်မြင်တဲ့အခါ လူအတော်များများအနေနဲ့ မျက်စိအားနည်းလို့ဆိုပြီး ပဲထင်တတ်ကြပါတယ်။

ဒါဟာမှားပါတယ်။

တိကျပြတ်သားတဲ့ပုံရိပ်တခုရဖို့ဆိုရင် မျက်စိဟာ ဘေးနားက ကြွက်သားတွေ အာရုံကြောတွေ စတဲ့အရာတွေနဲ့ တွဲပြီး အားလုံးအတူတကွအလုပ်လုပ်ရတာဖြစ်ပါတယ်။

မျက်စိကောင်းနေပေမယ့် မျက်စိဘေးနားကကြွက်သားတွေ၊အာရုံကြောတွေ စတဲ့အရာတွေမှာ ပြသာနာရှိနေရင်လည်း တိကျပြတ်သားတဲ့ပုံရိပ်မရနိုင်ပါ။

နှစ်ရိပ်နှစ်ထပ်မြင်ရတဲ့အကြောင်းရင်းတွေအနေနဲ့ကတော့ အများကြီးရှိပါတယ်။တချို့အကြောင်းရင်းတွေက အရေးမကြီးပေမယ့် တချို့အကြောင်းရင်းတွေကတော့ အရေးကြီးပါတယ်။

နှစ်ရိပ်နှစ်ထပ်မြင်ခြင်းကို ဖြစ်စေနိုင်တဲ့ အကြောင်းတွေကိုသိသလောက်တင်ပြရရင်တော့ အောက်ပါအတိုင်းဖြစ်ပါတယ်။

၁။မျက်လုံးနဲ့ဆိုင်တဲ့အကြောင်းရင်းများ

မျက်ကြည်လွှာထဲမှာ အင်ဇိုင်းတွေမျှခြေပျက်ကာ မျက်ကြည်လွှာတစ်သျှူးတွေအားနည်းလာပြီး မျက်ကြည်လွှာဟာ အဝိုင်းထုချွန်ပုံစံ ကတော့ပုံစံဖြစ်လာတာ(Keratoconus)

ရေယုန်ပိုး ဝင်ရောက်ကူးစက်ခံရပြီး မျက်ကြည်လွှာထိခိုက်တာ

မျက်ကြည်လွှာမှာအမာရွတ်တစ်သျှူးတွေဖြစ်တာ

မျက်လုံးခြောက်သွေ့တာ

မျက်လုံးထဲတိမ်ရှိတာ

မျက်စိစွေတာ

၂။ကြွက်သားနဲ့ဆိုင်တဲ့အကြောင်းရင်းများ

Myasthenia gravis လို့ခေါ်တဲ့ ရောဂါဖြစ်နေတာ

(ကိုယ်ခံအားနဲ့ဆိုင်တဲ့ရောဂါဆန်းတမျိုးဖြစ်ပြီး ကြွက်သားတွေကို အာရုံကြောတွေထိန်းချုပ်မှုမှကင်းလွတ်စေကာ အားနည်းလာစေပါတယ်။ဒီရောဂါရဲ့အစပိုင်းလက္ခဏာတွေဟာ နှစ်ရိပ်နှစ်ထပ်မြင်တာ နဲ့ မျက်ခွံတွဲကျတာ တွေဖြစ်ပါတယ်။)

Graves’ disease လို့ခေါ်တဲ့ရောဂါဖြစ်နေတာ

(ကိုယ်ခံအားနဲ့ဆိုင်တဲ့ရောဂါဆန်းတမျိုးဖြစ်ပြီး သိုင်းရွိုက်ဟော်မုန်းများခြင်းကိုဖြစ်စေသောရောဂါဖြစ်ပါတယ်။ခန္ဓာကိုယ်ရှိကြွက်သားတွေအားနည်းခြင်းကိုလည်းဖြစ်စေနိုင်ပါတယ်။နှစ်ရိပ်နှစ်ထပ်မြင်တာအပြင် ရင်တုန်တာ၊အိပ်မပျော်တာ၊ဝမ်းအသွားများတာ၊ပိန်လာတာတွေပါတွဲခံစားရနိုင်ပါတယ်။)

၃။အာရုံကြောနဲ့ဆိုင်တဲ့အကြောင်းရင်းများ

Multiple Sclerosis လို့ခေါ်တဲ့ရောဂါဖြစ်တာ

(ကိုယ်ခံအားစနစ်နဲ့ဆိုင်တဲ့ရောဂါဆန်းတမျိုးဖြစ်ပြီး အာရုံကြောတွေပေါ်မှာအုပ်ထားတဲ့ အမြှေးပါးကိုပျက်စီးစေကာ ဦးနှောက်နဲ့အာရုံကြောတွေကို ပျက်စီးမှုဖြစ်စေနိုင်ပါတယ်။နှစ်ရိပ်နှစ်ထပ်မြင်တာအပြင် အမြင်အာရုံပျောက်ကွယ်သွားတာ၊ခြေလက်ထုံကျင်တာ၊လှုပ်ရှားလို့မရတာ မျိုးတွေပါတွဲခံစားရတတ်ပါတယ်။)

Guillain-Barre Syndrome ဖြစ်တာ

(ကိုယ်ခံအားစနစ်နဲ့ဆိုင်တဲ့ရောဂါဆန်းတမျိုးဖြစ်ပြီး အာရုံတွေကိုထိခိုက်ဖျက်ဆီးတဲ့ရောဂါဖြစ်ပါတယ်။

အစောပိုင်းလက္ခဏာတွေအနေနဲ့ နှစ်ရိပ်နှစ်ထပ်မြင်တာ၊ခြေထောက်ပိုင်းမှာ အားနည်းထုံကျင်လာတာတွေခံစားရနိုင်ပါတယ်။

အရေးပေါ်အခြေအနေဖြစ်ပြီး ချက်ချင်းဆေးခန်း၊ဆေးရုံပြသဖို့လိုပါတယ်။)

Diabetes ဆီးချိုရောဂါဖြစ်တာ

ဆီးချိုရောဂါဖြစ်တဲ့အခါ သွေးတွင်းအချိုဓါတ်များလာပြီး ကောင်းစွာမထိန်းချုပ်နိုင်ပါက နှစ်ကြာတဲ့အခါ အာရုံကြောတွေထိခိုက်ပျက်စီးခြင်းကိုဖြစ်စေနိုင်ပါတယ်။မျက်စိအာရုံကြောတွေထိခိုက်တဲ့အခါ နှစ်ရိပ်နှစ်ထပ်မြင်တာတွေဖြစ်လာနိုင်ပါတယ်။)

၄။ဦးနှောက်နဲ့ဆိုင်တဲ့အကြောင်းရင်းများ

Brain tumors ဦးနှောက်အကျိတ်တွေရှိတာ

(ဦးနှောက်ထဲအကျိတ်ရှိတဲ့အခါ အကျိတ်တွေက အာရုံကြောတွေကိုသွားဖိတဲ့အတွက် အမြင်ဝါးတာ၊နှစ်ရိပ်နှစ်ထပ်မြင်တာကိုဖြစ်စေနိုင်ပါတယ်။)

ဦးနှောက်ထဲဖိအားများလာတာ

(ခိုက်မိတာ၊ပိုးဝင်တာ၊ဦးနှောက်ထဲသွေးယိုတာ၊ဦးနှောက်အကျိတ်ရှိတာ စတဲ့အကြောင်းတွေရှိရင် ဦးနှောက်ထဲဖိအားများလာပြီး နှစ်ရိပ်နှစ်ထပ်မြင်တာ၊ထိုးအန်တာ၊အမြင်ဝါးတာ တွေဖြစ်နိုင်ပါတယ်။)

ဦးနှောက်သွေးကြောပေါက်တာ၊ပိတ်တာ

(ဦးနှောက်သွေးကြောပေါက်တာ၊ပိတ်တာဖြစ်တဲ့အခါမှာ ဦးနှောက်ကသွေးကောင်းကောင်းမရတဲ့အတွက် အမြင်ဝါးတာ၊နှစ်ရိပ်နှစ်ထပ်မြင်တာဖြစ်နိုင်ပါတယ်။)

ဒါတွေကတော့ သိသလောက် နှစ်ရိပ်နှစ်ထပ်မြင်ခြင်းကိုဖြစ်စေနိုင်တဲ့အကြောင်းတွေပါ။

ဒါတွေအပြင် အရက်အသောက်လွန်တဲ့အခါ၊မူးယစ်ဆေးဝါး၊အိပ်ဆေး၊အတက်ကျဆေးစတာတွေသုံးတဲ့အခါ၊ခေါင်းတခြမ်းကိုက်တဲ့အခါ၊မျက်စိအသုံးပြုမှုများတဲ့အခါတွေမှာလည်း နှစ်ရိပ်နှစ်ထပ်မြင်ခြင်းဖြစ်နိုင်ပါတယ်။

သို့ပေမယ့် ဒီလိုအခြေအနေတွေမှာ နှစ်ရိပ်နှစ်ထပ်မြင်တာကတော့ ခဏပဲဖြစ်ပြီး အရက်မူးပြေတဲ့အခါ၊ခေါင်းကိုက်သက်သာသွားတဲ့အခါ ပြန်ကောင်းသွားနိုင်ပါတယ်။

မျက်လုံးနဲ့ဆိုင်တဲ့အကြောင်းရင်းတွေကြောင့်ဆိုရင်တော့ မျက်လုံးတဖက်တည်းမှာပဲ နှစ်ရိပ်နှစ်ထပ်မြင်တာ ဖြစ်ဖို့များပြီး တခြားအကြောင်းတွေကြောင့်ဆိုရင်တော့ မျက်လုံးနှစ်ဖက်လုံးမှာ နှစ်ရိပ်နှစ်ထပ်မြင်တာ ဖြစ်ဖို့များပါတယ်။

နှစ်ရပ်နှစ်ထပ်မြင်တာက ခဏပဲဖြစ်ပြီး ပျောက်သွားတာမျိုးရှိသလို မပျောက်ဘဲ ပိုပိုဆိုးလာတာမျိုးလည်းရှိပါတယ်။

ရက်ကြာတဲ့ထိမပျောက်တာ သို့မဟုတ် ပိုပိုဆိုးလာတာ မျိုးရှိတယ်ဆိုရင်တော့ ဆေးခန်းပြစမ်းသပ်ကြည့်ဖို့လိုပါတယ်။

ဒါ့အပြင်

နှစ်ရိပ်နှစ်ထပ်မြင်တဲ့အခါမှာ ခေါင်းကိုက်တာ၊မျက်ခွံတွဲကျတာ၊မျက်လုံးအားနည်းတာ၊တခြားနေရာတွေထုံကျင်အားနည်းတာ၊ကိုယ်အလေးချိန်ကျလာတာ၊ရင်တုန်တာ စသဖြင့်ပါတွဲဖြစ်တယ်ဆိုရင်လည်း နီးစပ်ရာဆေးရုံဆေးခန်း ချက်ချင်းပြသစစ်ဆေးကြည့်ဖို့လိုပါတယ်။

အဆုံးသတ်အနေနဲ့မှာချင်တာကတော့ အရပ်ထဲက လူအတော်များများဟာ နှစ်ရိပ်နှစ်ထပ်မြင်တဲ့အခါ မျက်လုံးအားနည်းလို့ ပင်ပန်းလို့ ဆိုပြီးပဲ တွေးကာ ပေါ့ပေါ့ပါးပါးနေတတ်ကြပါတယ်။ အပေါ်မှာဖော်ပြထားတဲ့ရောဂါကြီး၊ရောဂါဆန်းတွေရဲ့ လက္ခဏာတခုအနေနဲ့ တွေးမပူတတ်ကြပါ။

အတော်များများအနေနဲ့ကလည်း အဲ့လိုရောဂါကြီး၊ရောဂါဆန်းတွေကို မကြားဖူးကြတာများပါတယ်။

သို့ပေမယ့် ဆေးပညာရှင်၊သုတေသနပညာရှင်တွေ၊ဆေးစာအုပ်တွေကတော့ နှစ်ရိပ်နှစ်ထပ်မြင်တဲ့အခါ ရောဂါကြီး၊ရောဂါဆန်းတွေရဲ့ လက္ခဏာကနေ စစဉ်းစားရမယ်လို့ မှာကြားထားပါတယ်။

ဒါကြောင့် နှစ်ရိပ်နှစ်ထပ်မြင်နေပြီဆိုရင် အချိန်သိပ်မဆွဲဘဲ နီးစပ်ရာဆေးရုံဆေးခန်းပြသပါလို့ မှာကြားချင်ပါတယ်။

Dr 528

ဆက်စပ် ဆောင်းပါးများ