ကျန်းမာချင်ရင် ကိုယ်လုံးတီး အိပ်ပါ

ကျန်းမာချင်ရင် ကိုယ်လုံးတီး အိပ်ပါ

အိပ်စက်ခြင်းဆိုတာဟာ လူသားတွေအတွက် အရေးကြီးတဲ့အရာတခုဖြစ်ပါတယ်။

အိပ်ရေးဝမှသာ မနက်အိပ်ရာထ လန်းဆန်းပြီး တနေကုန်အလုပ်ကောင်းစွာလုပ်နိုင်မှာပါ။

အိပ်စက်ခြင်းနဲ့ပတ်သက်ရင် လူအတော်များများအနေနဲ့ အိပ်ရေးဝခြင်းရဲ့ကောင်းကျိုးတွေ၊အိပ်ရေးပျက်ခြင်းရဲ့ဆိုးကျိုးတွေလောက်ပဲ အသိများကြပါတယ်။

ဝတ်လစ်စလစ်အိပ်စက်ခြင်း(အဝတ်အစားမဝတ်ဘဲ ကိုယ်လုံးတီးအိပ်စက်ခြင်း)ဖြင့် ရနိုင်တဲ့ကျန်းမာရေးကောင်းကျိုးတွေကိုတော့ အသိနည်းကြပြီး အများစုကအိပ်တဲ့အခါမှာ အိမ်နေရင်းအဝတ်အစား သို့မဟုတ် ညအိပ်ဝတ်စုံ တွေကို ဝတ်အိပ်လေ့ရှိပါတယ်။

ဒါကြောင့် ဒီတပတ်မှာ ဝတ်လစ်စလစ်အိပ်စက်ခြင်း(အဝတ်အစားမဝတ်ဘဲ ကိုယ်လုံးတီးအိပ်စက်ခြင်း)ဖြင့် ဘယ်လိုအကျိုးကျေးဇူးတွေရနိုင်လဲဆိုတာကို ရေးသားတင်ပြချင်ပါတယ်။

သိသလောက်ပြောရရင် ဝတ်လစ်စလစ်အိပ်ပါက ရနိုင်တဲ့အကျိုးကျေးဇူး ၇ချက်ရှိပါတယ်။အဲ့ဒါတွေကတော့ အောက်ပါအတိုင်းဖြစ်ပါတယ်။

၁။လျင်မြန်စွာ အိပ်ပျော်စေခြင်း

National Sleep Foundation အဖွဲ့ကြီးရဲ့အဆိုအရ လျင်မြန်စွာအိပ်မောကျမကျ ဆိုတာဟာ ခန္ဓာကိုယ်ရဲ့အပူချိန်ပေါ်မှာများစွာ မူတည်ကြောင်းနဲ့ ခန္ဓာကိုယ်အပူချိန်အတိုင်းအတာတခုထိကျခြင်းဟာ လျင်မြန်စွာအိပ်မောကျအောင် အထောက်အကူပေးနိုင်ကြောင်းသိရပါတယ်။

အိပ်ခန်းထဲမှာ ဝတ်လစ်စလစ်အိပ်စက်ခြင်းဖြင့် ခန္ဓာကိုယ်အပူချိန်ဟာအတိုင်းအတာတခုထိကျဆင်းပြီး လျင်မြန်စွာ အိပ်ပျော်စေပါတယ်။

၂။နှစ်နှစ်ခြိုက်ခြိုက်အိပ်ပျော်စေခြင်း

သုတေသနတွေအရ နှစ်ခြိုက်စွာအိပ်ပျော်ဖို့ဆိုရင် အိပ်ခန်းတခုရဲ့အပူချိန်ဟာ 15 to 19°C ရှိရပါမယ်။

အပူချိန် အရမ်းပူတာ အရမ်းအေးတာ တွေဟာ အိပ်စက်ခြင်းရဲ့ REM အဆင့်ကိုထိခိုက်စေနိုင်ပြီး တရေးနိုးလန့်နိုးတာတွေဖြစ်စေကာ ကိုယ်ခန္ဓာနဲ့ဦးနှောက်ကို မကြည်မလင်ဖြစ်စေနိုင်ပါတယ်။

အိပ်ခန်းထဲကအိပ်ရာထဲမှာ ဝတ်လစ်စလစ်အိပ်စက်ခြင်းဟာ အရမ်းအေးတာကိုမဖြစ်စေနိုင်သလို အရမ်းပူတာကိုလည်းမဖြစ်စေနိုင်ဘဲ ကိုယ်အပူချိန်ကိုထိန်းညှိပေးနိုင်ပြီး နှစ်ခြိုက်စွာအိပ်ပျော်စေကြောင်း သုတေသနပညာရှင်တွေကပြောကြားထားပါတယ်။

၃။အရေပြားကျန်းမာရေးကိုအထောက်အကူပြုခြင်း

အဝတ်ဝတ်အိပ်တဲ့အခါမှာ ပူတာ၊ကြပ်တာ၊ခန္ဓာကိုယ် လေဝင်လေထွက်မကောင်းဘဲ အပူကိုလှောင်ထားသလိုဖြစ်တာတွေ နဲ့ ကောင်းကောင်းအိပ်မပျော်တာ၊အိပ်ရေးပျက်တာတွေကြောင့် အရေပြားဟာအရွယ်မတိုင်မှီအိုမင်းရင့်ရော်တာတွေဖြစ်လာနိုင်ပါတယ်။

ဝတ်လစ်စလစ်အိပ်စက်ခြင်းဖြင့် နှစ်ခြိုက်စွာအိပ်ပျော်ပြီး အရေပြားလေဝင်လေထွက်လည်းကောင်းတာကြောင့် အသားအရေကိုနုပျိုကျန်းမာစိုပြည်စေပါတယ်။

၄။အဆီပိုတွေကိုကျစေခြင်း

အိပ်ခန်းထဲက အိပ်ရာပေါ်မှာ အဝတ်အစားမဝတ်ဘဲ အိပ်ရုံနဲ့အဆီကျမယ်ဆိုတော့ တချို့က မဖြစ်နိုင်ဘူးလို့ ထင်ကြပါမယ်။

လေ့လာချက်တွေအရ ဝတ်လစ်စလစ်အိပ်လို့ကိုယ်အပူချိန်ကျလာပြီးအေးလာတဲ့အခါမှာ ခန္ဓာကိုယ် ပြန်နွေးဖို့အတွက် ခန္ဓာကိုယ်ရဲ့ ဇီဝရုပ်ဖြစ်ပျက်မှုဖြစ်စဉ် Metabolism ကမြန်လာပြီး ကယ်လိုရီတွေအများကြီးကိုလောင်ကျွမ်းစေပါတယ်။

အဲ့အခါမှာ အဆီပိုတွေကိုကျစေပြီး ခန္ဓာကိုယ်ဟာလည်း သွယ်လျလာပါတယ်။

၅။နှလုံးရောဂါဖြစ်ပွားနိုင်ခြေနည်းစေခြင်း

ဝတ်လစ်စလစ်အိပ်ခြင်းဖြင့် အရေပြားလေဝင်လေထွက်ကောင်းရုံသာမက သွေးလည်ပတ်စီးဆင်းမှုလည်းပိုကောင်းလာတဲ့အတွက် နှလုံးရောဂါဖြစ်ပွားနိုင်ခြေကို လျော့ကျစေပါတယ်။

၆။လိင်အင်္ဂါကျန်းမာရေးကိုအထောက်အကူပြုခြင်း

ညအိပ်တဲ့အခါ ကြပ်တဲ့အတွင်းခံဘောင်းဘီတွေဝတ်အိပ်ခြင်းဟာ လိင်အင်္ဂါနေရာမှာ ချွေးထွက်စိုစွတ်တာကိုဖြစ်စေပြီး မှိုပိုးပေါက်ပွားစေနိုင်ကာ လိင်အင်္ဂါကျန်းမာရေးကိုထိခိုက်စေနိုင်ပါတယ်။

ဝတ်လစ်စလစ်အိပ်ခြင်းဖြင့် လေဝင်လေထွက်ကောင်းစေတဲ့အတွက် ချွေးထွက်စိုစွတ်တာတွေ၊မှိုစွဲတာတွေမဖြစ်နိုင်ပါဘူး။

၇။အိမ်ထောင်ဖက်နဲ့သံယောဇဉ်ပိုခိုင်မာစေခြင်း

ဝတ်လစ်စလစ်အိပ်စက်ခြင်းကြောင့် အသားအသားချင်းပိုမိုထိတွေ့နိုင်ပြီး Oxytocin ဆိုတဲ့ဟော်မုန်းကိုလည်းများများထွက်စေနိုင်ပါတယ်။

Oxytocin ဟော်မုန်းဟာ အိမ်ထောင်ဖက်တဦးနဲ့တဦးကြား သံယောဇဉ်ကို ပိုမိုခိုင်မာစေပြီး လိင်ဆက်ဆံရာမှာလည်းခံစားမှုပိုကောင်းလာစေနိုင်ပါတယ်။

Dr 528

ဆက်စပ် ဆောင်းပါးများ