လက်သည်းခြေသည်းလေးတွေ ကျန်းမာလှပအောင်

လက်သည်းခြေသည်းလေးတွေ ကျန်းမာလှပအောင်

ဟိုနေ့က မှတ်မှတ်ရရ Duty off တုန်းလေး သူငယ်ချင်းတွေနဲ့ မုန့်သွားစားဖြစ်တယ်လေ။ ဘာရယ်မဟုတ်ပါဘူး အအေးခွက်လေးကို ကိုင်ထားတုန်း သူငယ်ချင်းမတစ်ယောက်က..

“ဟယ် နင့်လက်ကလေးကလှလိုက်တာ..လက်သည်းလေးတွေလည်းလှလိုက်တာ…House ဆင်းနေတာတောင် လက်လေးတွေကအစ လှအောင် ပြင်ပြင်ဆင်ဆင် နေနိုင်တုန်း..ငါတို့မှာတော့ လက်မပြောနဲ့ ကိုယ့်မျက်နှာတောင် မိတ်ကပ်မလိမ်းအားဘူးတော်…”

နောက်တစ်ယောက်ကလည်း..

“ဟုတ်ပါ့…အရင်ကနင် ခြေသည်းလက်သည်း အရှည်ထားမရဘူးလေ၊ ခြေစွယ်လဲ ခဏခဏငုတ်လို့ Nail spa တစ်ချိန်လုံးပြေးနေရတာ..ပွဲတွေဘာတွေရှိလို့ သွားခါနီးရင်လည်း ခြေသည်းအတု ဆက်ရတာအမော…ပြီးရင် နင်ဆိုခြေသည်းလက်သည်း အရှည်ထားလို့ရတယ်နော်..ငါလည်း မိန်းကလေးဆန်ဆန် ခြေသည်းလက်သည်းလှလှလေးနဲ့ နေချင်တာပေါ့..ဒါပေမဲ့ ငါ့လက်သည်းတွေက ကျွတ်ဆတ်ပြီး အရမ်းကျိုးလွယ်လို့ တုံးတိတိ လက်ပုတိုနဲ့ပဲနေနေရတယ်..”

သူများတွေတော့မသိဘူး။ ကျွန်မကိုယ်တိုင် အမြင်ဆိုလေ မိန်းကလေး တစ်ယောက်က မျက်နှာလေးပဲ လှနေရုံ ခြယ်သထားရုံနဲ့မပြီးဘူး။ လက်လေးတွေ ခြေထောက်လေးတွေ လှပစိုပြေနေမှ အမြင်တင့်တယ်တယ်လိုထင်တယ်။အဲ့ဒါကြောင့်လဲ လက်လေးတွေ ခြေထောက်လေးတွေက အစ ဂရုစိုက်ဖြစ်တယ်။

အမြဲလိုလို Nail spa တွေသွားပြီး မထိန်းသိမ်းနိုင်တဲ့ ကျွန်မလို လူတွေအတွက် လွယ်လွယ်ကူကူ သက်သက်သာသာနဲ့ အချိန်မကုန်ဘဲ လက်သည်းခြေသည်း အလှ ထိန်းသိမ်းနည်းလေးတွေကို ပြောပြပေးပါရစေနော်။

အရင်ဆုံး ရေကြက်သီးနွေးလေးထဲကို သံလွင်ဆီ၅စက်လောက်ထည့်ပါ။ ပြီးရင် လက်သည်းလေးတွေ မြုပ်ရုံထည့်ထားပါနော်။ ၅ မိနစ်ခန့်ပေါ့။ သံလွင်ဆီက လက်သည်းလေးတွေ ကျိုးလွယ်တာကို ကာကွယ်ပေးပါတယ်ရှင်။

လက်သည်းခြေသည်း အမြဲအရောင်ဆိုး၊ ပုံဆွဲထားတဲ့ သူတွေ တစ်လမှာ တစ်ပါတ်လောက် color free, chemical free period လေးထားပေးပါနော်။ လက်သည်းခြေသည်း ဆိုတာကလည်း သဘာဝအလင်းရောင်၊ သဘာဝ အောက်ဆီဂျင် ရဖို့လိုအပ်ပါတယ်ရှင်။ အမြဲတမ်း ဆိုးဆေးတွေနဲ့ဖုံးကွယ်ထားတာက လက်သည်း အောက်ဆီဂျင်ဓာတ်ကို လျော့နည်းစေသလို လက်သည်းဝါပြီး လက်သည်းခြေသည်း ကျန်းမာရေးကို ထိခိုက်စေပါတယ်။

ရှားစောင်းလက်ပက်ဂျယ်လ်၊ Vaseline လေး ရေချိုးပြီးတိုင်း လက်သည်း ခြေသည်းပေါ် လိမ်းပြီး လက်သည်းအတွက်လိုအပ်တဲ့ အာဟာရဓာတ် အစိုဓာတ်ကို ဖြည့်ကြမယ်။

နောက်တစ်ခုက လက်သည်းပန်းကုံးလေးတွေ အသားမာတက်တာ၊ အသားတက်တာ၊ အဖတ်လန်တာတွေ ကင်းဝေးစေဖို့ Baby oil၊ အုန်းဆီ စတဲ့ အဆီတစ်မျိုးမျိုး လိမ်းဖို့ မမေ့ကြပါနဲ့နော်။

Beauty from within ဆိုတဲ့အတိုင်းပဲ လက်သည်းခြေသည်းအလှကို အတွင်းထဲကနေ ထိန်းသိမ်းကြမယ်။ ဆိုလိုတာကတော့ သံဓာတ်အားဖြည့်ဆေး မှီဝဲကြပါလို့…သံဓာတ်က လက်သည်းခြေသည်း သန်စွမ်းဖို့ ကျန်းမာဖို့ အားပေးလို့ မှီဝဲကြဖို့ အကြံပေးပါရစေနော်…

အားလုံးပဲ လက်သည်းခြေသည်းလေးတွေ သဘာဝအတိုင်း ကျန်းမာလှပအောင် ဒီဆောင်းပါးလေးက ကူညီပေးမယ်လို့ မျှော်လင့်ပါတယ်ရှင်။

Scarlette( ဆေး၁ )

ဆက်စပ် ဆောင်းပါးများ