တယောက်မှ တယောက်သို့ ကူးစက်နိုင်တဲ့ မျက်စိကျိန်းခြင်း

တယောက်မှ တယောက်သို့ ကူးစက်နိုင်တဲ့ မျက်စိကျိန်းခြင်း

မျက်စိကျိန်းခြင်းဟာ အဖြစ်များတဲ့ ရောဂါတခုဖြစ်ပါတယ်။

ယောက်ျားမိန်းမ အသက်ကြီးငယ်မရွေး မျက်စိကျိန်းခြင်း ဖြစ်နိုင်ပါတယ်။

မျက်စိကျိန်းတယ်ဆိုတာဟာ မျက်စိမှာရှိတဲ့ conjunctiva ရောင်ရမ်းခြင်း ဖြစ်ပါတယ်။

Conjunctiva ဆိုတာဟာ မျက်ခမ်းမျက်ခွံတွေ အတွင်းမှာရှိတဲ့ အလွှာအကြည် လေးတခုဖြစ်ပြီး မျက်သား (Sclera) ကို ဖုံးကာပေးထားပါတယ်။

အကြောင်းတခုခုကြောင့် ဒီ Conjunctiva အလွှာလေး ရောင်ရမ်းလာတဲ့အခါမှာ မျက်စိကျိန်းခြင်း (မျက်စိနာခြင်း) ရောဂါကို ခံစားကြရပါတယ်။

မျက်စိကျိန်းခြင်း (မျက်စိနာခြင်း) ကို ဆေးပညာအရ Conjunctivitis လို့ခေါ်ပါတယ်။

အများအားဖြင့်တော့ မျက်လုံးတဖက်တည်းမှာပဲ ဖြစ်လေ့ရှိပါတယ်။

နှစ်ဖက်လုံးတပြိုင်တည်း ဖြစ်တာမျိုးကရှိတော့ရှိပေမယ့် အလွန်ရှားပါတယ်။

တဖက်ပျောက်ပြီးမှ နောက်တဖက်ဖြစ်တာမျိုးပဲ အဖြစ်များပါတယ်။

မျက်စိကျိန်းခြင်းဖြစ်တဲ့အခါ ဖြစ်တဲ့ဘက်ကမျက်လုံးရဲ့ မျက်သားအဖြူ (sclera) မှာ ပန်းရောင် သို့မဟုတ် အနီရောင်ဖြစ်နေတာ၊ မျက်လုံးထဲမှာတခုခုရှိနေသလို ကြမ်းရှရှခံစားရတာ၊ မျက်စိထဲမှာယားသလို ပူသလိုခံစားရတာ၊ မျက်ရည်ပူတွေကျတာ၊ မျက်ဝတ် (မျက်ချီး) တွေထွက်တာ၊ မျက်ခမ်းမျက်ခွံတွေ ရောင်တာ၊ အလင်းစူးတွေ သိပ်ကြည့်လို့မရတာ စသဖြင့် ခံစားရနိုင်ပါတယ်။

မျက်စိကျိန်းခြင်းဟာ အများအားဖြင့်တော့ ဘက်တီးရီးယားပိုးတွေနဲ့ ဗိုင်းရပ်ပိုးတွေဝင်ရောက်ကူးစက်ခံရခြင်းကြောင့် ဖြစ်တာပါ။

လည်ချောင်းနာတာ အရေပြားအနာ တွေကိုဖြစ်စေတဲ့ စထရက်တိုကော့ကပ်၊ စတက်ဖိုင်လိုကော့ကပ်စတဲ့ ဘက်တီးရီးယားတွေ

ကလာမိုင်းဒီးယား၊ ဂနိုစတဲ့ လိင်မှတဆင့်ကူးစက်တဲ့ ရောဂါတွေကို ဖြစ်စေတဲ့ ဘက်တီးရီးယားတွေ ဝင်ရောက်ကူးစက်ခံရခြင်းကြောင့် မျက်စိနာခြင်းဖြစ်နိုင်သလို

ဝက်သက်ရောဂါ၊ အအေးမိတုပ်ကွေးရောဂါ၊ ရေယုံရောဂါ တွေကိုဖြစ်စေတဲ့ ဗိုင်းရပ်စ်ပိုးတွေ ဝင်ရောက်ကူးစက် ခံရခြင်းကြောင့်လည်း မျက်စိနာခြင်းဖြစ်နိုင်ပါတယ်။

ဒါ့အပြင် ဖုန်တွေ၊ အမှုန်တွေ၊ မီးခိုးတွေဝင်တာ၊ ရေကူးကန်မှာ ရေကူးရင်းနဲ့ ကလိုရင်းခပ်ထားတဲ့ရေတွေ မျက်စိထဲဝင်တာ၊ ဆပ်ပြာရည်၊ ခေါင်းလျှော်ရည် မျက်စိထဲဝင်တာ၊ မတည့်တဲ့ မျက်စဉ်းခတ်မိတာ၊ မတည့်တဲ့ အိုင်းလိုင်နာတွေ မျက်စိခြယ်အလှပြင်ပစ္စည်းတွေ သုံးမိတာ၊ မျက်ကပ်မှန်တပ်တာ စသဖြင့်တွေကြောင့်လည်း ဖြစ်နိုင်ပါတယ်။

မျက်စိကျိန်းတာဟာ တယောက်ကနေ တယောက် ကူးစက်နိုင်ပါတယ်။

ဒါပေမယ့် အရပ်ထဲက ရှေးလူကြီးသူမတွေပြောတဲ့အတိုင်း မျက်စိကျိန်းတဲ့သူရဲ့ မျက်လုံးကို ကြည့်မိရာကနေ ကူးတာတော့ မဟုတ်ပါဘူး။

မျက်စိကျိန်းတဲ့သူမျက်လုံးကနေ ထွက်တဲ့မျက်ရည်နဲ့ မျက်ဝတ်တွေနဲ့ ထိမိတာ၊ သူသုတ်ထားတဲ့ မျက်နှာသုတ်ပဝါနဲ့ သုတ်မိတာ၊ သူလိမ်းထားတဲ့ အလှကုန်ပစ္စည်းတွေ သုံးမိတာ၊ သူတပ်တဲ့မျက်မှန်၊ မျက်ကပ်မှန်တွေ တပ်မိတာ၊ သူ့မျက်လုံးကို ကိုင်တဲ့ လက်နဲ့ ကိုယ့်မျက်လုံးကို လာကိုင်တာ၊ သူအိပ်တဲ့ ခေါင်းအုံးနဲ့ အိပ်မိတာ စတဲ့နည်းတွေနဲ့ ကူးတာပါ။

မျက်စိကျိန်းတဲ့အခါမှာ

မျက်စိကို ရေအေးအေးသန့်သန့်လေးနဲ့ မကြာခဏသန့်စင်ပေးပါ။ မျက်ခွံပေါ်မှာ ရေအေးဖတ်ကပ်ပါ။

လက်ကို မကြာခဏဆပ်ပြာနဲ့ သေချာသန့်စင်ဆေးကြောပေးပါ။

နေပူထဲ ထွက်တာရှောင်ပါ။ မဖြစ်မနေထွက်ရရင် နေကာမျက်မှန်တပ်ပါ။

ဖုန်းတီဗီကွန်ပျူတာသုံးတာ၊ စာဖတ်စာရေးတာ စတဲ့ မျက်လုံးအားစိုက်ရမယ့် အလုပ်တွေရှောင်ပါ။

မျက်ကပ်မှန်တပ်သူဆိုရင် မျက်စိနာနေစဉ်မှာ မျက်ကပ်မှန်ထုတ်ထားပါ။

မျက်စိကျိန်းနေစဉ်မှာ မျက်စိနဲ့ပတ်သက်တဲ့ အလှအပဆိုင်ရာပစ္စည်းတွေ ဘာမှမသုံးပါနဲ့။

နာကျင်မှု သက်သာအောင် Ibuprofen လို အကိုက်အခဲပျောက်ဆေးတွေ သောက်နိုင်ပါတယ်။ ယားယံမှု သက်သာအောင်ကတော့ Anti-Histamine အုပ်စုတွေဖြစ်တဲ့ Burmeton, Cetirizine စတာတွေ သောက်နိုင်ပါတယ်။

အများအားဖြင့်တော့ မျက်စိနာတာဟာ ဒီလိုတွေလုပ်ရင် နှစ်ရက်လောက်ဆိုသက်သာပျောက်ကင်းသွားတတ်ပါတယ်။

တကယ်လို့ နှစ်ရက်ကျော်ကြာတာတောင် မျက်စိကျိန်းတာမသက်သာတာ၊ မျက်စိကျိန်းတာ ပိုဆိုးလာတာ၊ မျက်စိအမြင်တွေဝါးလာတာ မှုန်လာတာ၊ မျက်စိနီရဲတာပိုဆိုးလာတာ စသဖြင့်ရှိရင်တော့ အချိန်မဆွဲဘဲ ဆေးရုံဆေးခန်းပြသဖို့လိုပါတယ်။

ဘာလို့လဲဆိုတော့ မျက်စိကျိန်းတာဟာ ကြာလာရင် မျက်ကြည်လွှာကိုပါ ထိခိုက်ပြီး မျက်ကြည်လွှာရောင်ခြင်း (Keratitis) ဖြစ်လာကာ မျက်စိကွယ်နိုင်လို့ပါ။

မျက်စိကျိန်းခြင်းဖြစ်နိုင်ခြေနဲအောင် အောက်ပါအချက်များကို ဂရုပြုလိုက်နာပါ။

မျက်စိကိုလက်နဲ့ မကြာခဏပွတ်ခြင်းကို ရှောင်ပါ။

မျက်နှာဆပ်ပြာတိုက်တဲ့အခါ၊ ခေါင်းလျှော်တဲ့အခါ မျက်စိထဲကို ဆပ်ပြာ၊ ခေါင်းလျှော်ရည်မဝင်အောင် ဂရုစိုက်ပါ။

ဖုန်အမှုန်ထူတဲ့ နေရာတွေကို ရှောင်ပါ။ လက်ကို မကြာခဏဆပ်ပြာနဲ့ သေချာသန့်စင်ပါ။ မျက်နှာသုတ်ပဝါ၊ ခေါင်းအုံး၊ မျက်မှန်၊ မျက်ကပ်မှန်တွေကို သူများနဲ့မျှမသုံးပါနဲ့။

Dr 528

ဆက်စပ် ဆောင်းပါးများ