လက်စွယ်၊ ခြေစွယ်ငုတ်ခြင်း

လက်စွယ်၊ ခြေစွယ်ငုတ်ခြင်း

လက်စွယ်၊ ခြေစွယ်ငုတ်တာကို လူတိုင်းနီးပါးကြုံတွေ့ခံစားဖူးကြမှာပါ။ လက်စွယ်ခြေစွယ်ငုတ်ရင် အရမ်းနာကျင်ပြီး နေရခက်ပါတယ်။

လက်စွယ်၊ ခြေစွယ်ငုတ်တာဟာ တကယ်တော့ လက်သည်း၊ ခြေသည်းဒေါင့် နေရာကအရေပြားတွေ ထိခိုက်ဒဏ်ရာရပျက်စီးပြီး ဘက်တီးရီးယားပိုး၊ မှိုပိုးတွေဝင်ရောက်ကူးစက်ခြင်းကြောင့်ဖြစ်တဲ့ ရောဂါအခြေအနေဖြစ်ပါတယ်။ ဆေးပညာအရ Paronychia လို့ခေါ်ပါတယ်။

လက်စွယ်၊ ခြေစွယ်ငုတ်တာဟာ လက်သည်း၊ ခြေသည်းရဲ့အပေါ် ဒေါင့်နေရာတွေမှာလည်းဖြစ်နိုင်သလို၊ အောက်ဖက်ဒေါင့်နေရာတွေမှာလည်း ဖြစ်နိုင်ပါတယ်။

လက်စွယ်၊ခြေစွယ်ငုတ်ခြင်းဟာ

– လက်သည်းကိုက်တဲ့အကျင့်ရှိသူတွေ

– လက်ကိုပါးစပ်ထဲထည့်စုပ်တဲ့အကျင့်ရှိသူတွေ

– လက်သည်းညှပ်တဲ့အခါ အပေါ်ဒေါင့်နေရာတွေကို တအားတိုအောင်ညှပ်မိလေ့ရှိသူတွေ

– ရေနဲ့အမြဲထိတွေ့နေရပြီး အမြဲတစေခြေလက်စိုစွတ်နေတဲ့သူတွေ ( ဥပမာ – အဝတ်လျှော်တဲ့သူတွေ၊ ပန်းကန်ဆေးတဲ့သူတွေ)

– ဆီးချိုရောဂါအခံရှိတဲ့သူတွေ

– အရေပြားရောဂါအခံရှိတဲ့သူတွေ

– ဗီတာမင်ဘီဝမ်းချို့တဲ့သူတွေ

– လက်ချောင်းခြေချောင်းတွေမှာမကြာခဏထိခိုက်ဒဏ်ရာရလေ့ရှိသူတွေ မှာဆိုရင်ပိုဖြစ်တတ်လေ့ရှိပါတယ်။

လက်စွယ်၊ ခြေစွယ်ငုတ်ခြင်းဖြစ်တာမှာ ရေတိုဖြစ်ခြင်း (Acute paronychia) နဲ့ ရေရှည်ဖြစ်ခြင်း(Chronic paronychia) လို့ခေါ်ပါတယ်။

Acute paronychia ကတော့ လက်သည်း၊ ခြေသည်းနားတဝိုက် အရေပြားတွေ ထိခိုက်ဒဏ်ရာရပြီး Staphylococcus နဲ့ Enterococcus ဘက်တီရီးယားပိုးတွေ ဝင်ရောက်တာကြောင့်ဖြစ်ပါတယ်။ ဖြစ်တဲ့အခါမှာ ရုတ်တရက်ဖြစ်တာမျိုးဖြစ်ပြီး သေချာကုသပါက အချိန်သိပ်မကြာဘဲ ပျောက်ကင်းနိုင်ပါတယ်။

Chronic paronychia ကတော့ Yeast မှိုပိုးကြောင့်ဖြစ်တတ်ကာ ရေနဲ့ထိတွေ့မှုများပြီး ခြေလက်အမြဲစိုစွတ်နေတဲ့သူတွေမှာ ဖြစ်လေ့ရှိပါတယ်။ ဖြစ်တဲ့အခါမှာလည်း တဖြည်းဖြည်းရောင်ရမ်းတာကစဖြစ်ပါတယ်။ မှိုပိုးက တဖြည်းဖြည်းနဲ့ အရေပြားအောက်အလွှာထိ ပါဝင်ရောက်ကူးစက်နေတာမျိုးဖြစ်တဲ့အတွက် ပျောက်ဖို့က လနှင့်ချီကြာတတ်ပါတယ်။

ရောဂါလက္ခဏာတွေအနေနဲ့ကတော့ ရေတိုလက်စွယ်ခြေစွယ်ငုတ်တာ နှင့် ရေရှည်လက်စွယ်ခြေစွယ်ငုတ်တာက ဆင်တူပါပဲ။ သိသာကွဲပြားတာမရှိပါ။

လက်စွယ်ခြေစွယ်ငုတ်ခြင်းဖြစ်ရင် ခံစားရနိုင်မယ့်လက္ခဏာတွေကတော့ ……

– ဖြစ်တဲ့ လက်သည်း၊ ခြေသည်းနားတဝိုက် အရေပြားတွေ နီရဲနာကျင်ပြီး ရောင်ရမ်းနေတာ၊

– ပြည်တည်အဖုလေးဖြစ်လာတာ၊

– လက်သည်းခြေသည်းတွေရဲ့ပုံမှန်ပုံစံ၊အရောင်တွေပျက်စီးတာ

– လက်သည်းခြေသည်းတွေ ကွာကျတာ စသဖြင့်ပါ။

လက်စွယ်၊ ခြေစွယ်ငုတ်ခြင်းရဲ့ ကုသမှုအနေနဲ့ကတော့ ဖြစ်တဲ့အမျိုးအစားနဲ့ ရောဂါအခြေအနေပေါ်မူတည်ပါတယ်။

ရေတိုအမျိုးအစားဖြစ်ပြီး အခြေအနေသိပ်မဆိုးဘူးဆိုရင်တော့ အိမ်မှာပဲ လက်စွယ်၊ ခြေစွယ်ငုတ်တဲ့ လက်ချောင်းခြေချောင်းကို ရေနွေးနွေးကလေး (ကြက်သီးနွေး) ထဲသို့ စိမ်ပေးပြီး ခြောက်အောင်သေချာအဝတ်သန့်နဲ့သုတ်ပေးပါ။

တနေ့ကို ၄ကြိမ် သို့မဟုတ် ၅ကြိမ် လောက်စိမ်နိုင်ပါတယ်။ ဒီလိုလုပ်ခြင်းဖြင့် နာကျင်တာသက်သာသလို ပြည်တည်နေပါကလည်း သူ့ဘာသာသူ ပြည်ထွက်သွားနိုင်ပါတယ်။

ဒီလိုလုပ်လို့ မသက်သာဘူးဆိုရင်တော့ ဆေးခန်းပြပြီး ပိုးသတ်ဆေးတွေ သောက်ရတာထိုးရတာ ထုံဆေးပေးပြီး ပြည်တည်နာကို ဖောက်ရတာ လက်သည်းခြေသည်းကိုဖြုတ်ထုတ်ရတာ စသဖြင့် လိုနိုပါတယ်။

အဆုံးသတ်အနေနဲ့ အကြံပေးချင်တာကတော့ လက်စွယ်၊ ခြေစွယ် ငုတ်တဲ့အခါ မိမိဘာသာမိမိပြည်တည်တာကို အပ်နဲ့ဖောက်တာ သို့မဟုတ် ဆရာဝန်မဟုတ်တဲ့ လက်စွယ် ခြေစွယ်ဖော်ပေးတဲ့သူတွေနဲ့ပြပြီး လက်စွယ်ခြေစွယ်ဖော်တာမျိုးတွေ လုံးဝမလုပ်ဖို့အကြံပေးချင်ပါတယ်။

အခန့်မသင့်ရင် တခြားပိုးတွေပါထပ်ဝင်ပြီး ရောဂါပိုဆိုးသွားနိုင်လို့ပါ။

Dr 528

ဆက်စပ် ဆောင်းပါးများ