ချက်ကနေ ကွ ျံတဲ့အူ

 

ချက်ကနေ ကွ ျံတဲ့အူ

အူကျွံတယ်၊အူကျတယ်ဆိုတာဟာ ဝမ်းဗိုက်အတွင်းထဲက အူ သို့မဟုတ် ကလီစာအစိတ်အပိုင်းတခုခုဟာ သူရှိရမယ့်နေရာကနေ အားနည်းနေတဲ့ဝမ်းဗိုက်ကြွက်သားနေရာကိုဖြတ်ပြီး တခြားနေရာကို တိုးထွက်လာခြင်းဖြစ်ပါတယ်။

အူကျွံခြင်းဟာ အသက်အရွယ်မရွေး၊ကျားမ မရွေး ဖြစ်နိုင်ပါတယ်။

အူကျွံခြင်းအဖြစ်များတဲ့နေရာတွေကတော့ ပေါင်ခြံကြား၊ပေါင်အပေါ်အတွင်းဘက်၊ခွဲထားတဲ့အမာရွတ်၊ချက်နဲ့ချက်တဝိုက် စတဲ့နေရာတွေဖြစ်ပါတယ်။

အခုတခေါက်ဆောင်းပါးမှာတော့ ချက်နေရာကနေ အူကျွံခြင်းအကြောင်းကိုရေးသားတင်ပြချင်ပါတယ။်

ချက်နေရာကနေအူကျွံခြင်းကို ဆေးပညာအရ umbilical hernia လို့ခေါ်ပါတယ်။

မွေးကင်းစ ကလေးတွေမှာအဖြစ်များပါတယ်။

ကလေးလေးတွေ သန္ဓေသားဘဝနဲ့ မိခင်သားအိမ်ထဲမှာရှိစဉ်ချက်ကြိုးက သားအိမ်နံရံမှာရှိတဲ့အချင်းမှ ထွက်လာပြီး သန္ဓေသားရဲ့ဝမ်းဗိုက်နေရာကနေ သန္ဓေသားကိုယ်ထဲဝင်ရောက်ကာ သန္ဓေသားလိုအပ်တဲ့ အစာအာဟာရနဲ့အောက်စီဂျင်တွေကိုထောက်ပံ့ပေးပါတယ်။

ကလေးမွေးလို့ ချက်ကြိုးဖြတ်ပြီးနောက်မှာ ချက်ကြိုးရဲ့လုပ်ငန်းဆောင်တာတွေမရှိတော့တဲ့အတွက် ချက်ကြိုးဝင်ရောက်ခဲ့တဲ့ ကလေးရဲ့ဝမ်းဗိုက်နေရာဟာ ဝမ်းဗိုက်ကြွက်သားတွေနဲ့ပိတ်သွားပြီး ချက်အဖြစ်နဲ့ကျန်ခဲ့ရပါတယ်။

ဒါကပုံမှန်ပါပဲ။

တချို့ကလေးတွေမှာကျ ချက်ကြိုးဖြတ်ပြီးနောက်မှာ ချက်ကြိုးဝင်ရောက်ခဲ့တဲ့ဝမ်းဗိုက်နေရာကကြွက်သားတွေဟာ ပြီးပြည့်စုံစွာမပိတ်တာမျိုးလည်းရှိပါတယ်။

အဲ့အခါမှာ ဝမ်းဗိုက်အတွင်းထဲက အူ သို့မဟုတ် ကလီစာတွေဟာ အပြည့်အဝမပိတ်တဲ့ကြွက်သားနေရာမှတဆင့် ကျွံထွက်လာပြီး umbilical hernia ခေါ် ချက်နေရာမှအူကျွံခြင်းဖြစ်လာပါတယ်။

ချက်နေရာမှအူကျွံတာဟာ လမစေ့ဘဲမွေးတဲ့ကလေးတွေ၊ပေါင်မပြည့်ဘဲမွေးတဲ့ကလေးတွေမှာ အဖြစ်များလေ့ရှိပါတယ်။

လက္ခဏာအနေနဲ့ကတော့ ချက်ကလေးစူနေတာကလွဲရင် တခြားသိသာတဲ့လက္ခဏာတွေ ပြလေ့မရှိပါဘူး။

နာကျင်တာမျိုးလည်းရှိလေ့မရှိပါ။

ကလေးငယ်ရယ်တဲ့အခါ၊ငိုတဲ့အခါ၊အီးညှစ်တဲ့အခါတွေမှာ ချက်ကလေးဟာ ပိုပြီးဖောင်းထွက်လာတတ်ပါတယ်။

ကုသမှုအနေနဲ့ကတော့ ဝမ်းဗိုက်ကြွက်သားတွေဟာ ကလေးမွေးပြီးပြီးချင်းမှာ ပြည့်စုံစွာမပိတ်လည်း နောက်ထပ်သုံးလေးနှစ်လောက်နေရင် သူ့ဘာသာသူပြည့်စုံစွာပြန်ပိတ်နိုင်ခြေရှိတဲ့အတွက် သုံးလေးနှစ်အရွယ်လောက်ထိ စောင့်ကြည့်တာပါပဲ။

သုံးလေးနှစ်အရွယ်လောက်မှ သူ့ဘာသာသူပြည့်စုံစွာပြန်မပိတ်ရင် သို့မဟုတ် စောင့်ကြည့်နေစဉ်ကာလအတွင်းမှာ ကျွံတဲ့အူက အခန့်မသင့်လို့ မစင်နဲ့ပိတ်သွားပြီး ကလေးက မခံမရပ်နိုင်အောင်နာကျင်တာ၊အန်တာ စသဖြင့် ဖြစ်လာရင်တော့ ခွဲစိတ်ကုသမှုခံယူဖို့လိုပါတယ်။

umbilical hernia ခေါ် ချက်နေရာမှအူကျွံခြင်းဟာ လူကြီးတွေမှာလည်းဖြစ်နိုင်ခြေရှိပါတယ်။

umbilical hernia ခေါ် ချက်နေရာမှအူကျွံခြင်းဟာ ကိုယ်အလေးချိန်များတဲ့သူတွေ၊မကြာခဏကိုယ်ဝန်ဆောင်တဲ့အမျိုးသမီးတွေ၊နှစ်မြွှာပူး၊သုံးမြွှွာပူးမွေးတဲ့အမျိုးသမီးတွေ၊အကြောင်းတခုခုကြောင့် ဗိုက်ခွဲစိတ်ထားတဲ့သူတွေ၊ရေရှည်ချောင်းဆိုးတာ မကြာခဏဖြစ်တတ်တဲ့သူတွေ မှာဆိုရင် ဖြစ်နိုင်ခြေပိုများပါတယ်။

လူကြီးအရွယ်တွေမှာ ချက်ကနေအူကျွံခြင်း(umbilical hernia)ဖြစ်ပြီဆိုရင်တော့ မွေးစကလေးတွေလို သူ့ဘာသာသူပြန်ပိတ်နိုင်ခြေမရှိတဲ့အတွက် သုံးလေးနှစ်စောင့်လို့မရပါ။

ဒါ့အပြင် ဖြစ်တဲ့အခါမှာ နာကျင်တာ၊နေရထိုင်ရခက်တာမျိုးတွေလည်းခံစားရနိုင်တဲ့အတွက် အများအားဖြင့် ခွဲစိတ်ကုသမှုခံယူဖို့လိုပါတယ်။

Dr 528

 

ဆက်စပ် ဆောင်းပါးများ