နို့အန်တတ်တဲ့ကလေးတွေမှာ  ဆေးခန်းပြကိုပြဖို့လိုအပ်တဲ့အခြေအနေတွေ

နို့အန်တတ်တဲ့ကလေးတွေမှာ  ဆေးခန်းပြကိုပြဖို့လိုအပ်တဲ့အခြေအနေတွေ

ကလေးတွေမှာ နို့အန်တယ်ဆိုတာဟာ ကလေးတွေနို့စို့ပြီးတဲ့နောက်မှာ သူတို့ရဲ့ ပါးစပ် သို့မဟုတ် နှာခေါင်း သို့မဟုတ် နှစ်နေရာစလုံး ကနေ နို့ရည်အချို့ပြန်ထွက်ကျခြင်းဖြစ်ပါတယ်။

မွေးကင်းစကနေ ၆လအရွယ် ကလေးလေးတွေဟာ နို့စို့ပြီးတဲ့နောက် မှာ နို့အန်တာမျိုး မကြာမကြာ ဖြစ်တတ်ပါတယ်။နို့ဘူးစို့တဲ့ကလေးတွေမှာပိုဖြစ်တတ်ပါတယ်။

အရပ်အခေါ်အနေနဲ့ နို့သက်တယ်လို့လည်းခေါ်ကြပါတယ်။

ဆေးပညာအရတော့ reflux သို့မဟုတ် posseting လို့ခေါ်ပါတယ်။

အများအားဖြင့်တော့ နို့သက်တာဟာ ၆လကျော် ၇လအရွယ်လောက်မှာ ပျောက်သွားလေ့ရှိပါတယ်။တချို့တွေမှာတော့ ၁နှစ်အရွယ်လောက်မှ ပျောက်သွားတာမျိုးလည်းရှိပါတယ်။

ကလေးတွေမှာဘာဖြစ်လို့နို့အန်ခြင်းဖြစ်ရတာလဲ။

ကလေးတွေနို့စို့တဲ့အခါမှာ သို့မဟုတ် ကလေးတွေကိုမိခင်နို့တိုက်တဲ့အခါမှာ ပုံစံမမှန်ခြင်းကြောင့် နို့နဲ့အတူလေတွေကိုပါ ကလေးတွေက မျိုချမိတတ်ပါတယ်။

ထိုမျိုချမိတဲ့လေတွေဟာ အစာအိမ်ထဲရောက်သွားပေမယ့် လေရဲ့သဘောသဘာဝအရ ပေါ့တဲ့အတွက် အထက်ကိုပြန်ဆန်ပါတယ်။

အဲ့အခါမှာ ပြန်ဆန်တဲ့လေတွေနဲ့အတူ နို့ရည်အချို့ပါ ပါလာပြီး ကလေးငယ်ရဲ့ပါးစပ်၊နှာခေါင်းနေရာတွေကနေ စီးကျတတ်ပါတယ်။

ဒါ့အပြင် ကလေးငယ်လေးတွေဟာ သူတို့ဗိုက်နဲ့မဆန့်အောင် နို့ရည်ပမာဏများများစို့မိတဲ့အခါမှာဆိုရင်လည်း ပိုတဲ့နို့ရည်တွေဟာ နို့စို့ပြီးနောက် ခဏနေရင် ကလေးရဲ့ပါးစပ်နှာခေါင်းတို့ကနေ ပြန်ထွက်ကျတတ်ပါတယ်။ဘာလို့လဲဆိုတော့ ၁နှစ်အောက်ကလေးအရွယ်တွေမှာဆိုရင် အစာရေမျိုပြွန်အောက်ခြေနားက အစာဝင်တာကိုခွင့်ပြုပေးပြီး အစာပြန်ထွက်တာကို ကာကွယ်ပေးတဲ့ ကြွက်သားက လူကြီးတွေလိုကောင်းစွာမဖွံ့ဖြိုးသေးတာကြောင့်ဖြစ်ပါတယ်။

နို့အန်ခြင်းဖြစ်တာကို လျော့နည်းအောင် ကလေးကိုနို့တိုက်တဲ့အခါမှာအောက်ပါအချက်တွေကိုလိုက်နာဖို့လိုပါတယ်။

၁။ကလေးရဲ့ဦးခေါင်းနဲ့ ခန္ဓာကိုယ်ကို တဖြောင့်တည်း ထားရှိရပါမယ်။

၂။ကလေးရဲ့မျက်နှာကို မိခင်ဘက်ကိုလှည့်စေပြီး ကလေးရဲ့ပါးစပ်နဲ့နှာခေါင်းတို့ကို နို့သီးခေါင်း (Nipple)နဲ့ မျက်နှာချင်းဆိုင်ထားရှိရပါမယ်။

၃။မိခင်ရဲ့နို့သီးခေါင်းနဲ့ နို့သီးခေါင်းထိပ်အဝိုင်း (Nipple and Aerola)ကို နို့စိုနေတဲ့ ကလေးပါးစပ်ထဲများနိုင်သမျှ များများဝင်အောင် သေချာပြုလုပ်ပေးရပါမယ်။

၄။ကလေးငယ်ရဲ့ ဦးခေါင်းနဲ့ခန္ဓာကိုယ်ကို တညီတည်းရှိအောင် ဆက်လက်ထားရှိပြီး ကျောပိုင်းကို အမှီသေချာပေးထားရပါမယ်။

နို့ဘူးတိုက်တဲ့အခါမှာလည်း ကလေးအသက်အရွယ်နဲ့သင့်တော်မယ့် နို့သီးခေါင်းအမျိုးအစားကိုရွေးချယ်ပါ။

နို့ဘူးရဲ့နို့သီးခေါင်းအပေါက် အရမ်းကျဉ်းတာ သို့မဟုတ် အရမ်းကျယ်တာ မျိုးနဲ့မတိုက်မိအောင်သတိထားရပါမယ်။

ပက်လက်အနေအထား၊ခွေခေါက်နေတဲ့အနေအထားမျိုးတွေနဲ့မတိုက်ရပါ။

အနည်းငယ်ထောင်မတ်တဲ့အနေအထားနဲ့တိုက်ပါ။

မိခင်နို့ပဲတိုက်တိုက် နို့ဘူးပဲတိုက်တိုက် ကလေးကိုအချိန်မှန်နို့တိုက်ရပါမယ်။တိုက်ရမယ့်အချိန်မတိုက်ဘဲ တအားနောက်ကျမှ တိုက်ပါက ကလေးငယ်ဟာအရမ်းဆာတဲ့အတွက် အလောတကြီး နို့စို့ပါက လေတွေပါ အများကြီးမျိုချမိတတ်လို့ပါ။

နို့တိုက်ပြီးတဲ့နောက်မှာ ကလေးငယ်ကို မိမိရဲ့ပခုံးပေါ်တင်ပြီး လမ်းလျှောက်ရင်းနဲ့ ကလေးငယ်ရဲ့နောက်ကျောလေးကို အသာအယာပုတ်ပေးခြင်းဖြင့် လေထုတ်ပေးပါ။

ကလေးကို အဝတ်အစားအကြပ်တွေဝတ်ပေးတာမျိုးကိုရှောင်ပါ။

အဆုံးသတ်အနေနဲ့ပြောချင်တာကတော့ နို့အန်တာဟာ ကလေးငယ်လေးတွေမှာဖြစ်တတ်တဲ့ကိစ္စတခုမို့ မစိုးရိမ်ရဖို့များပေမယ့်

နို့အန်တာက အန်နေကျပမာဏ ထက်ပိုပြီးများတာ

အန်တဲ့ထဲမှာအစိမ်းရောင်တွေ(သည်းခြေရည်)တွေပါလာတာ

ကလေးကလည်းမလန်းဘဲ အီနေတာ၊ဖျားတာ၊ဝမ်းလျှောတာ၊မျက်တွင်းချိုင့်လာတာ၊သတိလစ်တာ စတဲ့အချက်တွေပါဖြစ်ရင်တော့ နီးစပ်ရာဆေးခန်းပြသဖို့လိုပါတယ်။

Dr 528

 

ဆက်စပ် ဆောင်းပါးများ