ကင်ဆာ  ကကြီးခကွေး

ကင်ဆာ  ကကြီးခကွေး

ကင်ဆာလို့ ပြောလိုက်ရင် ဘယ်နေရာမှာပဲဖြစ်ဖြစ် ရောဂါကြီးတယ်ဆိုတာ မပြောဘဲ သိကြတယ်။ ကင်ဆာစစ်ဆေးတာတွေကြည့်ပြီး ဒါကင်ဆာလား လို့မေးတတ်တဲ့ မေးခွန်းတွေလည်း ရှိတယ်။ တစ်ချို့ ဆေးစစ်တာမှာ Carcinoma ကာဆီနိုမား လို့ရေးတယ်။ တစ်ချို့ ဆေးစစ်တဲ့ နေရာတွေမှာတော့ Sarcoma ဆာကိုးမား လို့ ရေးကြတယ် ။
Carcinoma ကာဆီနိုမား နဲ့ Sarcoma ဆာကိုမား ဘာကွာလဲ ဒီနှစ်ခုက ဖြစ်တဲ့နေရာတွေမတူပါဘူး ။
Sarcoma တွေက mesenchymal cells လို့ခေါ်တဲ့ ဆဲလ်အလွှာကနေ ဖြစ်လာတာပါ။ Sarcoma ဖြစ်နိုင်တဲ့ ကိုယ်တွင်းအင်္ဂါအစိတ်အပိုင်းတွေက အရိုး ကြွက်သား အဆီ သွေးကြောနဲ့ အရွတ်တွေစတဲ့ နေရာတွေကနေဖြစ်တဲ့ ကင်ဆာတွေကို ခေါ်တာပါ ။
Carcinoma တွေက epithelial cells တွေနဲ့ ဖွဲ့စည်းထားတဲ့ ကိုယ်တွင်းအင်္ဂါအစိတ်အပိုင်းတွေမှာ ကင်ဆာဖြစ်တာကို ခေါ်တာပါ။ ဥပမာ အရေပြား အဆုတ် ရင်သား ပန်ကရိယ နဲ့ တစ်ခြားအကျိတ်တွေကဖြစ်တဲ့ ကင်ဆာတွေပါ ။
ထူးဆန်းတာတစ်ခုကတော့ အရိုးမှာဆိုရင်တော့ ဒီကင်ဆာနှစ်မျိုးလုံးဖြစ်ခွင့်ရှိပါတယ်။ အရိုးတစ်ခုမှာ mesenchymal ဆဲလ် ရော epithelial ဆဲလ် ရော နှစ်မျိုးလုံးပါဝင်နေလို့ပါ ။
ကင်ဆာနှစ်မျိုးမှာ Carcinoma အမျိုးအစားတွေက တစ်ချို့တွေမှာ မျိုးရိုးလိုက်ပြီး ဖြစ်နိုင်ပါတယ်။ ဥပမာ အူမကြီးကင်ဆာတို့ ရင်သားကင်ဆာတို့ဆိုရင် မိဘ ဆွေမျိုးဖြစ်ဖူးတယ်ဆို နောက်လူတွေမှာလည်း ဖြစ်နိုင်ချေရှိပါတယ်။ Sarcoma အုပ်စုတွေကတော့ မျိုးရိုးမလိုက်တတ်ပါဘူး ။ကိုယ့်မှာရှိတာကြောင့် သားသမီးတွေမှာ လိုက်မဖြစ်တတ်ပါဘူး ။
Sarcoma အုပ်စု ကင်ဆာတွေ ဘာကြောင့်ဖြစ်တယ်ဆိုတာ ပြောလို့မရပါဘူး ဖြစ်ချင်တဲ့သူမှာဖြစ်တာပါ Carcinoma အုပ်စုကင်ဆာတွေမှာတော့ တစ်နေရာချင်းစီအလိုက် ဖြစ်တဲ့ အကြောင်းအရင်းတွေမတူတတ်ကြပါဘူး ဥပမာ ဆေးလိပ်အရမ်းသောက်တဲ့အခါ အဆုတ်ကင်ဆာဖြစ်စေနိုင်တာမျိုးတွေပါ ။
အဖြစ်များတဲ့ Sarcoma အုပ်စု ကင်ဆာတွေ ရှိပါတယ် အဆီကျိတ်တွေကနေ ကင်ဆာအဖြစ်ပြောင်းသွားတဲ့ liposarcoma တွေ ကြွက်သားတွေမှာဖြစ်တဲ့ ကင်ဆာ leiomyosarcoma တွေပါ ။
Sarcoma အုပ်စုကင်ဆာတွေက အဓိကအားဖြင့် အဆုတ်ကိုပဲ ပျံ့တတ်ပါတယ်။ တစ်ခြားနေရာတွေပျံ့တာ နည်းလွန်းပါတယ်။ အရေပြား အကျိတ်နဲ့ အသည်းလည်း တစ်ခါတစ်လေ ရှားရှားပါးပါးပျံ့နေတတ်ပါတယ် ။Carcinoma တွေက ကင်ဆာဖြစ်နေတဲ့ ကိုယ်တွင်းအစိတ်အပိုင်းအနီးတစ်ဝိုက်တွေ သွေးကြောကတစ်ဆင့် ပြန်ရည်ကြောကတစ်ဆင့် နေရာစုံ ပျံ့နိုင်ပါတယ်။ အဓိကအားဖြင့် အသည်း အဆုတ်အရိုး ဦးနှောက် နဲ့ ရင်သားစတာတွေကို ပျံ့နှ့တတ်ပါတယ် ။
ကင်ဆာ စစ်ဆေးတာကတော့ နှစ်မျိုးလုံးမှာ အသားစယူစစ်တာတွေ လိုပါတယ်။ သွေးဆီး စတဲ့ လိုအပ်တာတွေလည်း စစ်ရပါတယ်။ ရလာတဲ့ အဖြေကိုကြည့်ပြီး အဆင့်ခွဲပေးရပါတယ် ။
ကင်ဆာတို့ရဲ့ ထုံးစံအတိုင်း Sarcoma ရော Carcinoma ရော အဆင့်များလေ ကုဖို့ခက်လေပါ ။အဆင့်နည်းနေသေးတဲ့ အချိန်ဆိုရင်တော့ ကင်ဆာကို တတ်နိုင်သလောက်ကြိုးစားပြီး ကုကြပါတယ် ။
Sarcoma တွေက စသိကာစဆိုရင် ခွဲစိတ်ကုတာတစ်ခုတည်းနဲ့ ကုကြပါတယ်။ ခွဲဖို့ကြီးနေတယ်ဆိုရင်တော့ မခွဲခင်အရင်ဆေးသွင်းတာတွေ အရင်လုပ်တတ်ကြတယ်။ တစ်ချို့ Sarcoma တွေကတော့ ခွဲစိတ်ပြီးမှ ဆေးသွင်းတာ ဓာတ်ကင်တာတွေ လုပ်ကြတယ်။ ခွဲလို့ကျန်နေတဲ့ ကင်ဆာဆဲလ်တွေကို သေစေအောင်ပါ ။
Carcinoma တွေမှာ စသိကာစမှာပဲ အဆင့်တွေများနေတတ်ပါတယ်။ တစ်နေရာတည်းမှာပဲ ရှိသေးတယ်ဆိုရင်တောင် ခွဲစိတ်ကုတာတစ်ခုတည်းနဲ့ မပြီးတတ်ပါဘူး။ ကင်ဆာအကျိတ်က ဘယ်နေရာမှာ ရှိတယ်ဆိုတာကိုကြည့်ပြီး ခွဲလို့ရမရလည်း ပြန်တွက်ရပါတယ်။ ခွဲပြီးရင်လည်း ဆေးသွင်းတာ ဓာတ်ကင်တာတွေ မဖြစ်မနေလုပ်ရပါတယ်။ အပြီးပျောက်တာတော့ ရှားပါတယ် အဆင့်နည်းနေတဲ့ အချိန်စောစောသိမှပဲ ကုရတာပိုအဆင်ပြေတတ်ပါတယ် ။
Dr. CST

 

ဆက်စပ် ဆောင်းပါးများ